Қашқадарё вилоятида дори-дармон ва тиббиёт буюмларини қиммат нархларда етказиб бериш ҳолати аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Қашқадарё вилоят бошқармаси томонидан терговга қадар текширув ўтказилган. Унда «А.» МЧЖ раҳбари Б.Ф. ва бошқалар 2020—2021 йиллар ва жорий йилнинг апрель ойига қадар Республика шошилинч тиббий ёрдам илмий марказининг Қашқадарё филиалига дори-дармон ва тиббиёт буюмларини белгиланган 15 фоиз устамадан ортиқча нарх қўйиб етказиб бергани аниқланган. Оқибатда жами 2,3 миллиард сўмни ўзлаштириш ёки растрата қилиш йўли билан талон-торож қилинган.
Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)