Ўзбекистондаги энг йирик EPS пудратчиси Enter Engineering ва WOOD (Австралия) инжиниринг-консалтинг компанияси Қорақалпоғистондаги Тебинбулоқ конида бойитиш фабрикасини деталли лойиҳалаш бўйича шартнома имзолади.
Шартномани Enter Engineering томонидан компания бош директори Улуғбек Усмонов ва WOOD (Австралия) компанияси томонидан фойдали қазилмаларни қазиб олиш бўйича катта вице-президент Грег Хейс имзолади.
Мазкур шартнома йилига 5 миллион тоннагача темир рудаси концентратини ишлаб чиқариш қувватига эга бўлган бойитиш фабрикасини лойиҳалаштириш бўйича ишларни кўзда тутади.
Бойитиш фабрикаси Қорақалпоғистонда Тебинбулоқ темир рудаси кони негизида барпо этилаётган тоғ-металлургия мажмуаси таркибига киради. Мажмуа 58 миллион тонна қазиб олинган руда концентратидан ташқари, 3,6 миллион тоннагача билвосита тикланувчи темирни ишлаб чиқаради. Ушбу ҳажмдан 1,8 миллион тонна билвосита тикланувчи темир Бекободдаги металлургия заводига етказиб берилади. Қолган хом ашёдан Тебинбулоқдаги заводда 1,5 миллион тонна тайёр маҳсулот ишлаб чиқарилади.
Лойиҳанинг Қорақалпоғистонда амалга оширилиши мамлакатимизда биринчи марта Ўзбекистон президенти Шавкат Мирзиёев томонидан эълон қилинган «хом ашёдан тайёр маҳсулотгача» тамойили бўйича қуриладиган қора металлургия корхонасини ташкил этиш имконини беради.
WOOD компанияси дунёдаги энг йирик саноат корхоналарини қуриш борасида 160 йиллик тажрибага эга лойиҳачи сифатида шуҳрат қозонган.
Детальли лойиҳалашга қўшимча равишда, WOOD компанияси энг яхши етказиб берувчилар орасида мавжуд халқаро тажрибасига асосланиб, корхона учун муҳим бўлган ускуналарни сотиб олишда йўл-йўриқ кўрсатиш хизматини ҳам тақдим этади.
Изоҳ (0)