Россия ТИВ: «Толибон даврида Афғонистондан Марказий Осиёга гиёҳванд моддалар оқими кўпайган»
Афғонистондан Марказий Осиёга наркотик моддалар савдоси толиблар ҳокимият тепасига келганидан сўнг ортди, дейди Россия Ташқи ишлар вазирлигининг янги чақириқлар ва таҳдидлар департаменти директори Владимир Тарабрин. Унга кўра, 2022 йилнинг биринчи чорагида Тожикистонда 14,5 баробар кўп афғон наркотиклари мусодара қилинган. Бу ҳақда «Коммерсантъ» нашри хабар бермоқда.
2022 йил 3 апрелда янги ҳокимият кўкнори етиштириш ва барча турдаги гиёҳванд моддаларни ишлаб чиқариш савдоси тақиқланганлигини эълон қилди. Бироқ апрель ойининг иккинчи ярмида мамлакат жанубида кўкнори йиғиш ҳамда ташиш учун тўсиқлар бўлмади. Шу билан бирга, «шимолий йўналиш» бўйлаб гиёҳванд моддалар савдосининг сезиларли ўсиши қайд этилган», — деди жаноб Тарабрин.Россия Ташқи ишлар вазирлиги (ТИВ) вакилининг таъкидлашича, БМТнинг Наркотиклар ва жиноятчилик бўйича бошқармаси маълумотларига кўра, 2021 йилда мамлакатда афюн эквивалентидаги 6,8 минг тоннага яқин гиёҳванд моддалар ишлаб чиқарилган бўлиб, ундан олинган даромад Афғонистон ялпи ички маҳсулотининг 14 фоизини ташкил қилган.
Владимир Тарабриннинг фикрича, Ғарб давлатлари Афғонистоннинг молиявий активларини тўсиб қўйган шароитда кўкнори етиштириш ва гиёҳванд моддалар ишлаб чиқариш афғон аҳолиси учун деярли ягона даромад манбаи бўлиб қолмоқда. Шунингдек, қурғоқчилик ва уруғлик ҳамда ўғит етишмаслиги фонида уларни қонуний экинлар билан алмаштириш истиқболлари деярли кўринмайди.
Аввалроқ, Россия президентининг Афғонистон бўйича махсус вакили Замир Кабулов ҳам «Толибон» ҳокимиятда бўлган йил давомида наркотик моддалар ишлаб чиқаришни камайтира олмаганини айтган эди.
Мавзуга доир: Кобулда аёллар «Нон, иш, эркинлик» шиори остида норозилик намойиши ўтказди (видео)
