Шимолий Корея Жанубий Корея етакчиси Юн Сок Ёль президентлигининг 100-кунида Ғарбий Корея кўрфази йўналишида иккита қанотли ракета учирди, деб ёзади «РБК».
«Бугун (17 август) эрталаб Жанубий Пхёнан провинциясида Ончхон-гун туманидан Ғарбий денгизга қарата иккита қанотли ракета учирилди. Ҳарбийларимиз АҚШ билан яқин ҳамкорлик қилиш ҳамда огоҳликни ва кузатувни кучайтириш орқали тўлиқ шайликни сақлаб турибди», — дея Khan нашрига ўз манбаси маълум қилди.
Yonhap ракеталар Жанубий Корея президенти Юн Сок Ёлнинг инаугурациясидан буён 100 кун ўтганидан кейин учирилганига эътибор қаратди. Ўша куни аввалроқ у агар КХДР денуклеаризация (ядровий қуролсизланиш)га «қатъий бел боғлагани»ни намоён қилса, Жанубий Корея ўз қўшнисига иқтисодий ва технологик жиҳатдан ёрдам беришини айтганди. Шу билан бирга, Юн Сок Ёль Шимолий Корея ҳукуматига ҳеч нарса хавф солмаслигини таъкидлади.
Бундан ташқари, Жанубий Корея ва АҚШ 16 августдан буён мамлакат шимолида, КХДР билан чегара яқинида «Озодлик қалқони» ҳарбий машғулотларини олиб бормоқда.
2018 йилда АҚШ ва КХДР хавфсизлик кафолати ва санкциялар олиб ташланиши эвазига Шимолий Кореяни ядровий қуролсизлантириш бўйича музокараларни бошлаган эди. Бироқ кейинроқ Пхеньян Вашингтонни музокараларни чўзишда айблади ва битимни «қопқон» деб атади. 2020 йил бошида Шимолий Корея етакчиси Ким Чен Ин агар АҚШ КХДРга нисбатан душманларча сиёсатдан воз кечмаса, «ярим оролда ҳеч қачон денуклераризация бўлмаслиги»ни айтди.
БМТ бош котиби Антониу Гутерриш ядро қуролига эга мамлакатларни бир неча марта қуролсизланиш йўлига қайтишга чақирган ва ядро қуроли қўлланилмаслигига ягона кафолат — уни тўлиқ йўқ қилиш эканини айтганди. Жанубий Кореяга сўнгги ташрифи чоғида ҳам у КХДРни ядровий қуролсизланишга чақирганди.
Бунга жавобан Шимолий Корея ТИВ вакили Ким Сон Гён ушбу баёнотлар бош котиб мажбуриятларига зид эканини, чунки уларда «холислик ва адолат» йўқлигини ва улар «халқаро ҳамжамиятнинг адолатли позицияси»ни билдирмаслигини айтганди.
Изоҳ (0)