Фарғонадаги заводнинг ишчиси ўзини ёқиб юбориб вафот этган, Қашқадарёдаги заводнинг эса иш пайтида оғир тан жароҳати олган ходимлари билан боғлиқ жараён ўрганилаётгани маълум қилинди. Бу ҳақда АОКАда бўлиб ўтган матбуот анжуманида Бандлик ва меҳнат муносабатлари вазири маълумот берди.
«Ҳар икки ҳолат — Фарғонада устига бензин қуйиб ўзини ёқиб юборган ва сўнгра вафот этган, Қашқадарёдаги GTL заводининг авария сабаб жароҳат олган ходимлари билан боғлиқ жараён эътиборимизда. Мазкур масалалар ҳақидаги батафсил маълумот вазирлик ишчи гуруҳи хулосасидан сўнг жамоатчиликка маълум қилинади», — дейди вазир Нозим Ҳусанов.
Вазирнинг айтишича, Фарғона ва Қашқадарёдаги завод ишчилари билан боғлиқ кўнгилсиз воқеалардан сўнг вазирлик ташаббуси билан ишчи гуруҳ тузилган.
«Бунақа воқеалардан сўнг ҳар доим Бандлик ва меҳнат муносабатлари вазирлиги ташаббуси билан ҳамкор ташкилотлар иштирокида ишчи гуруҳ тузилиб, ходимнинг меҳнат фаолияти билан боғлиқ ҳолатлар ўрганиб чиқилади», — дейди вазир.
Эслатиб ўтамиз, 2022 йилнинг 18 июнь куни Қашқадарёдаги GTL заводида авария юз бергани, бир киши вафот этиб, икки киши куйиш жароҳати олгани хабар берилганди. «Ўзбекнефтгаз» АЖ ахборот хизмати буни рад этиб, ҳолат одатий иш жараёнларидан бири эканини билдирганди. Фарғона нефтни қайта ишлаш заводининг 48 ёшли ходими эса 2 август куни раҳбариятидан норозилик белгиси сифатида устига бензин сепиб, ёқиб юборганди. Воқеани изоҳлаган завод масъуллари аёл ишдан бўшатилмаганини, фақат вазифаси ўзгарганини айтиб чиққанди. Бир ҳафта шифохонада даволанган завод ишчиси 2022 йилнинг 10 август куни вафот этди. Завод раҳбарияти эса аёлнинг етим қолган тўрт нафар қизи ва ишсиз эрини оталиққа олганини эълон қилди.
Изоҳ (0)