Ҳаддан ташқари иссиқ ва қурғоқчил ёз минтақадаги дарёларни қуритгани сабабли Европада табиий газ нархи кўтарилди. Бу ҳақда Bloomberg хабар бермоқда.
Нархлар ошишига дарёларнинг сув сатҳи пасайгач етказиб беришда муаммолар юзага келгани сабаб бўлмоқда.
Бенчмарк хом нефтининг фьючерслари душанба куни 0,7 фоизгача кўтарилди. Европа дарёларидаги сув сатҳининг жуда пастлиги дизель, кўмир ва бошқа товарларни қитъа орқали ташишни қийинлаштирмоқда. Шу билан бир қаторда, коммунал хизматлар учун кўпроқ газ сарфланмоқда.
Бундан ташқари мамлакатлар нархлар ўсишини ҳам назорат остида ушлаб турибди. Германия газ жамғариш бўйича белгиланган муддатдан икки ҳафта олдин мақсадга эришди.
Рейн дарёсидаги сув сатҳи бу ҳафта жуда паст даражада бўлиши кутилмоқда.
Германия ҳукуматининг сўнгги маълумотларига кўра, дарёнинг Франкфуртнинг ғарбий қисмидаги саёз нуқтаси 30 сантиметрга (11,8 дюйм) тушиши ва камида 18 августга қадар шу даражада бўлиши керак. Рейн Ғарбий Европанинг ёқилғи ва бошқа саноат товарларини ташиш учун энг муҳим дарёдир.
Бозорда рақобат ўта кучли, Россиядан «Шимолий оқим» газ қувури орқали етказиб бериш ҳамон чекланган миқдорда ва савдогарлар суюлтирилган газ юклари учун курашмоқда.
Бундай кам миқдордаги оқим Европа иқтисодиётига путур етказди, саноат ишлаб чиқаришига зарба берди, инфляцияни ўнлаб йиллардаги энг юқори даражага кўтарди ва йирик иқтисодларни рецессияга олиб келиши билан таҳдид қилди.
Шанба куни Германия Иқтисодиёт вазирлиги қиш олдидан газ истеъмолини 20 фоизга қисқартиришга интилаётгани сабабли, давлат ва хусусий секторда офислардаги минимал ҳароратни камайтиришни таклиф қилди.
Изоҳ (0)