1979 йил 8 августда «Пахтакор» Ворошиловграднинг «Заря» жамоасини 3:1 ҳисобида мағлубиятга учратади. Ушбу учрашув «Пахтакор»нинг ўша вақтдаги таркиби учун энг сўнгги ўйин бўлгани ҳеч кимнинг хаёлига келмасди.
Кейинги учрашув 13 август куни Минскнинг «Динамо»сига қарши бўлиб ўтиши лозим эди. 11 август куни Украинанинг Днепродзержинск шаҳри яқинида 8400 метр баландликда Тошкент-Гурев-Донецк-Минск йўналиши бўйича учаётган Tu-134 ҳамда шу русумдаги яна бир самолёт ҳавода бир-бирига тўқнашиб кетади.
Фожиа натижасида икки самолёт бортида бўлган 178 кишининг барчаси ҳалок бўлди. Улар орасида ўша вақтда ўзбек футболининг фахри ҳисобланган «Пахтакор»нинг 17 нафардан иборат таркиби ҳам бўлган. «Дарё» фожиада ҳалок бўлган «Пахтакор» аъзолари ёдга олинган 2021 йилдаги мақолани қайта тақдим этади.
Идгай Тазетдинов (мураббий)
1933 йил 13 январда таваллуд топган. Фаолиятини Тошкентнинг «Медик» болалар жамоасида бошлаган. Ундан сўнг «Труд»да ўйнаган. 1953—55 йилларда «Спартак»нинг иккинчи жамоаси шарафини ҳимоя қилган. 1956 йилда «Пахтакор»га ўтган. 4 йил давомида «Б» классда 108 та ўйинда майдонга тушган ва 21 та гол урган. 1958 йилдан бошлаб жамоа сардорлиги унга топширилган.
«А» классда 1960—1963 йиллар давомида 94 та ўйинда майдонга тушиб, 12 та гол урган. 1964—1965 йилларда «Политотдел»га ўйновчи мураббий бўлиб ўтган. Ундан сўнг «Янгиер», «Андижон», «Янгиариқ» жамоаларидан сўнг 1977 йилда «Пахтакор» мураббийига айланган.
Михаил Ан (ярим ҳимоячи)
1952 йил 19 ноябрда туғилган. Михаил акаси Дмитрий билан бирга Свердловдаги ёшлар жамоаси тарбияланувчиси ҳисобланади. 1968 йилда Тошкентдаги спорт мактаб-интернатига қабул қилинади. Фаолиятини «Политотдел»да бошлаган футболчи 1971 йилда «Пахтакор»га ўтади.
Ан янги ўзбек футболининг ёрқин футболчиларидан бири эди. У жамоадошлари билан тез тил топишар, кучли ва аниқ зарбага эга эди. СССРнинг юқори лигасида 138 ўйинда майдонга тушиб, 30 та голни ўз ҳисобига ёздириб қўйган. 1974 ва 1978 йилда СССРнинг энг яхши 33 футболчиси рўйхатида учинчи ўринни эгаллаган.
Ёшлар ўртасидаги Европа чемпионатида (1976) СССР терма жамоасини сардор сифатида майдонга олиб чиққан. СССР миллий терма жамоасида эса 2 та ўйин ўтказган.
Ан жароҳат олганди ва Минскдаги «Динамо»га қарши ўйинда иштирок этмаслиги керак эди. Аммо жамоадошлари Михаилни ўзлари билан бирга боришга кўндиради. 27 ёшли Ан ҳам авиаҳалокат қурбонига айланади.
Олим Аширов (ҳимоячи)
1955 йил 25 январда Тошкентда таваллуд топган. Аширов бутун фаолиятини «Пахтакор»да ўтказган. Ҳимоя чизиғининг алмаштириб бўлмас футболчиси бўлган. 149 ўйинда 5 та гол уришга муваффақ бўлган 24 ёшли Аширов ҳам ўша машъум ҳалокатга учраган самолёт бортида бўлган.
Равил Агишев (ҳимоячи)
1959 йил Бухорода туғилган. Равил болалигидан футболга меҳр қўйган ва Бухоронинг «Спартак» жамоасида футбол сирларини ўргана бошлаган. 1978 йилда «Пахтакор» футболчини ўз сафига қўшиб олди. Ўша йили Агишев 13 та ўйинда майдонга тушди. Мухлислар ҳимоячини илиқ қабул қилди. Фожиали 1979 йилда эса 14 та ўйинда иштирок этишга улгурган Равил 20 ёшида ҳалок бўлди.
Владимир Фёдоров (ҳужумчи)
Владимир 1955 йил 5 январда Тошкент вилояти Ўртачирчиқ туманида таваллуд топган. 1972 йилдан бошлаб «Пахтакор» сафида ўйнашни бошлаган. Фёдоровнинг Тошкент жамоаси сафидаги дебют ўйини «Звезда»га қарши бўлган. Владимирнинг биринчи голи ҳал қилувчи ролни бажарган.
1974 йилда СССРнинг энг яхши ҳужумчилари рўйхатида иккинчи ўринни эгаллаган. Ўша йилнинг 18 октябрида СССР терма жамоаси таркибида биринчи ўйинини ўтказган. Европа чемпионатида Ирландияга қарши ўйинда захирадан майдонга тушган. Умумий ҳисобда терма жамоада 18 та ўйинда иштирок этган. 25 ёшида авиаҳалокат қурбонига айланди.
Константин Баканов (ярим ҳимоячи)
1954 йил 25 майда Тошкентда таваллуд топган. 1966 йилда Тошкентдаги зилзиладан сўнг оиласи билан Москвага кўчиб кетади. Москванинг «Динамо» жамоаси мактабига боришдан бош тортади ва 1971 йилда «Пахтакор»нинг иккинчи жамоасига қабул қилинади. 1972 йилда биринчи лигада 2 та ўйин ўтказади ва оғир жароҳат олади. 1973—1975 йиллар давомида майдонга туша олмайди.
1976 ва 1977 йилларда 72 та ўйинда иштирок этиб, 17 та гол уради. Юқори лигада эса 1978—1979 йиллар мобайнида ҳаракат қилиб, 42 та ўйинда 7 та голни ўз ҳисобига ёздириб қўяди. Ўша вақтда унга Москванинг «ЦСКА» жамоаси таклиф келиб тушганди. Баканов 25 ёшида фожиали ўлим топади.
Юрий Загуменних (ҳимоячи)
1947 йил 7 июнда туғилган. Фаолиятини Владивостокнинг «Луч» жамоасида бошлаган. 1970 йилда «Зенит» футболчини ўз жамоасига таклиф қилган. 1975 йилда машғулотлар вақтида оғир жароҳат олади ва операция қилинади. Бир ярим йил давомида футбол билан шуғуллана олмаган Юрий 1977 йилда катта футболга қайтади. Аммо «Зенит» футболчига чиқиш эшикларини кўрсатади. Загуменних «Пахтакор»га ўтади. Юрий Тошкент жамоаси сафида асосий футболчилардан бирига айланади. Юрий Загуменних «Зенит» тарихидаги энг яхши 55 футболчи рўйхатидан ўрин олган.
Ҳалокат содир бўлган паллада Загуменних 32 ёшда эди.
Александр Корчёнов (ярим ҳимоячи)
1949 йил 4 августда Қозон шаҳрида таваллуд топган. 1972 йилда Вячеслав Соловёв Александрни «Пахтакор»га таклиф қилади. Корчёнов жамоанинг алмаштириб бўлмас футболчисига айланади. 1977 йилда сардорлик боғичи унга топширилади. Юқори лигада (1973—1975, 1978—1979) 126 та ўйинда иштирок этиб, 3 та гол урган. Биринчи лигада эса (1976—1977) 70 ўйинда 9 та гол уришга муваффақ бўлган. Корчёнов 30 ёшида ҳалок бўлди.
Николай Куликов (ҳимоячи)
1953 йил 25 апрелда Москвада туғилган. 12 ёшида Москванинг «Динамо» жамоаси тайёрлов гуруҳига қабул қилинган. 1974 йилда эса Хоразмнинг «Хонқа» жамоаси футболчини ўз сафига қўшиб олади. У ерда 2 мавсум ўйнагач, 1976 йилда «Янгиер» жамоасига ўтади. Бир йилдан кейин «Пахтакор» ҳимоячини харид қилади. Куликов «Пахтакор»да 21 ўйинда майдонга тушади ва мухлисларнинг севимли футболчисидан бирига айланади.
Николай самолётда ҳалок бўлган вақтда 26 ёшда эди.
Владимир Макаров (ярим ҳимоячи)
1947 йил 9 март куни Тожикистоннинг Сталинобод шаҳрида (ҳозирги Душанбе) таваллуд топган. 10 ёшидан футбол билан шуғуллана бошлаган. Профессионал фаолиятини 1966 йил Душанбенинг «Энергетик» жамоасида бошлаган. 1974 йилда эса Одессанинг «Черноморец» жамоасига ўтади. Биринчи йил 30 ўйинда 13 та гол урган Владимир жамоанинг тўпурарига айланади.
Кейинги мавсумларда ҳам ишончли ҳаракат қилган Макаров «Пахтакор»нинг қизиқишлар доирасига тушиб қолади. Тошкент жамоасига ўтган футболчи 1978 йилда чемпионатда 5 та гол уради. 1979 йилги мавсумда эса 14 та ўйинда иштирок этган 32 ёшли Макаровга Минскда бўлиб ўтиши кўзда тутилган 15-ўйинни ўтказиш насиб этмайди.
Сергей Покатилов (дарвозабон)
1950 йил 30 декабрда Ашхободда таваллуд топган. 18 ёшида «Строител» жамоасига қабул қилинади ва у ерда 5 мавсум фаолият олиб боради. 1973 йилда Покатилов «Пахтакор»га таклиф этилади. Янги жамоасида Сергей дарҳол асосий дарвозабонга айланади. 1975 йилда эса жароҳат олиб сафдан чиқади. Узоқ вақт давомида жароҳатини даволайди. Жароҳатидан тузалган Покатилов «Динамо»га қарши ўйинда жамоанинг асосий дарвозабони сифатида Минскка бораётган эди. Покатилов ўша вақтда 30 ёшда эди.
Виктор Чуркин (ҳужумчи)
1952 йил 25 январда Қозоғистоннинг Чимкент шаҳрида туғилган. 1968—1970 йиллар мобайнида Чимкентнинг «Металлург» жамоасида ўйнаган. 1971—1975 йилда «СКА» жамоаси шарафини ҳимоя қилади. 1976 йилда эса «Пахтакор» сафига қўшилади. 27 ёшли Чуркин ҳам ҳалок бўлган самолёт ичида бўлган.
Сирожиддин Бозоров (ҳужумчи)
1961 йилда Самарқанд вилояти Нарпай туманида туғилган. 1972 йил Республика спорт-интернатига ўқишга киради. Икки йилдан сўнг Ўзбекистон ёшлар терма жамоаси сафига чақирилган. Интернатнинг 10-синфида ўқиб юрган вақтларида «Пахтакор»нинг ўринбосарлар жамоаси таркибида ўйнаган. 1978 йил собиқ Иттифоқ ёшлар Спартакиадасида Ўзбекистон ёшлар термаси таркибида кумуш медалга сазовор бўлган.
Сирожиддин авиаҳалокатда дунёдан кўз юмган футболчилар ичида энг кичиги эди. 10 август куни 19 ёшни қарши олган Сирожиддин Минскка боришни хоҳламаганини кўпчилик айтади. Аммо асосий жамоада жароҳатланганлар кўпчилиги учун Сирожиддин ҳам майдонга тушиши мумкинлиги сабаб таркибга киритилади. Асосий таркибда бирорта ўйин ўтказмаган Бозоров ҳалокат қурбонига айланади.
Шуҳрат Эшбўтаев (ҳужумчи)
1959 йил 8 февралда таваллуд топган. Шуҳрат Навоий мактаби тарбияланувчиси. 1978 йилда «Пахтакор» эътиборини тортган футболчи ўринбосарлар жамоасига қабул қилинади. Илк мавсумида 6 та гол урганди. 1979 йилда «Пахтакор»нинг асосий таркибига жалб этилади.
Дебют ўйинида Юрий Загуменних ўрнига майдонга тушган Эшбўтаев орадан 20 дақиқа ўтиб гол уради. Бош мураббий Олег Базилевич Шуҳратни кейинги ўйинларда асосий таркибда тушира бошлайди. Шуҳрат Эшбўтаевнинг «Пахтакор» сафидаги охирги ўйини «Заря»га қарши бўлиб қолди. 20 ёшли Эшбўтаев ҳам авиаҳалокат қурбонига айланди.
Владимир Собиров (ҳужумчи)
1958 йил 14 январда Бухорода таваллуд топган. «Пахтакор» спорт мактабида таҳсил олган. 1977 йилда Хоразмнинг «Хонқа» жамоасида ҳам ўйнашга улгурган Владимир 1979 йилдагина «Пахтакор» асосий таркибидан жой ола бошлайди. Бош мураббий Олег Базилевич футболчига майдонда ўзини кўрсатиш учун имконият беради. Афсуски, ўша йили 21 ёшли Собиров ҳам бошқа жамоадошлари сингари ҳаётдан кўз юмади.
Футболчилар ва мураббийдан ташқари шифокор Владимир Чумаков (1932—1979) ва маъмур Мансур Толибжонов (1944—1979) ҳам бўлган. Улар ҳам авиаҳалокат натижасида вафот этган.
Тез фурсат ичида Тошкентга бошқа клублардан футболчилар чақирилди ва жамоа мавсумни давом эттирди. Уч мавсум мобайнида жамоага олий лигадан тушиб кетмаслик имконияти тақдим этилди. Лекин ҳаётдан кўз юмган бутун бир жамоа ўрнини ҳеч ким ва ҳеч нарса боса олмасди.
Ўша машъум ҳалокат туфайли кўп минг сонли ишқибозлар футболдан бутунлай кўнгил узди. «Пахтакорчилар»нинг оила аъзоларига қанчалик қийин бўлганлигини тасаввур қилиш мушкул бўлмаса керак. Навбатдаги учрашувларга ташриф буюрган мухлислар кўзларида ёш билан янги жамоа иштирокидаги ўйинни кузатиб борарди...
Бугун авиаҳалокатга 43 йил тўлди. Шунча вақт ўтса ҳам «пахтакорчилар» мухлислар қалбида, хотирасида қолмоқда.
Маъруфжон Очилов тайёрлади
Изоҳ (0)