Франциядаги Венсен қасрига россияликлар киритилмаяпти

Франция ҳукумати россияликлар учун Венсен қасрига киришни чеклади, деб ёзади Meduza.

Agence France-Presse қайд этишича, қасрда Франциянинг ҳарбий архивларни бошқарувчи тарихий мудофаа хизмати бош қароргоҳи жойлашган, шу сабабли қаср Маданият вазирлиги ва Мудофаа вазирлиги томонидан биргаликда юритилади.

Ҳарбий идора аниқлик киритишича, Украинага ҳужум туфайли, россияликларнинг Мудофаа вазирлиги қарамоғидаги «ҳарбий иншоотлар»га кириши чекланган.

AFP ёзишича, июль охирида икки нафар россиялик аёл қасрга киритилмаган. Уларнинг сўзларига кўра, қўриқлов хизмати улардан паспортларини кўрсатишни сўраган, кейин эса улар бу ерга кириши мумкин эмаслигини айтган. Бунинг сабаби ҳақида сўрашганида эса соқчи: «Чунки сизлар россияликсизлар», — деб жавоб берган.

Венсен қасри XIV—XVI асрларда қурилган. Дастлаб у ерда қироллар қароргоҳи, сўнг — қамоқхона жойлашган. Бу қамоқхонада маркиз де Сад, Дени Дидро, Мата Хари каби машҳур маҳбуслар сақланган.