Туш танлашда аҳамият бериш керак бўлган 5 та жиҳат

Туш чўткалари нима учун турлича бўлиши ва оддий тушлар сувга чидамлисидан нимаси билан фарқ қилиши ҳаммага ҳам маълум эмас. «Новий очаг» нашри аёлларнинг севимли косметик маҳсулоти — туш танлашда эътибор қаратиш керак бўлган муҳим белгилар ҳақда сўз юритди.

Тушнинг киприкларга мос келадиганини топиш ҳам лотереяда чиққан ютуққа ўхшайди. У киприкларни узайтириши, қайириши ҳамда ҳажм ҳам қўшиши керак. Лекин бу ҳаммаси эмас, туш сотиб олаётганда нималарга эътибор бериш кераклигини визажист Камила Белова маълум қилди.

Туш чўткаси

• Эътибор бериш керак бўлган биринчи нарса, албатта, чўткадир, чунки бу туш қандай қўлланилишини ва уни киприкларга қандай таъсир кўрсатишини белгилайди.
• Ингичка чўтка ҳар бир киприкни ҳатто кўзларнинг бурчакдагиларини ҳам бўяшга қодир. Пастки киприклар учун эса айни муддао.
• Агар чўтка қум соати шаклида бўлса, унда бу зиёфатлар учун мўлжалланган макияжда қўл келиши мумкин: у киприкларни кўтаради ва уларнинг қалин кўриниш билан таъминлайди.
• Конуссимон чўтка тор учи туфайли кўзларнинг бурчакларидаги киприкларни мукаммал бўяйди.
• Спирал шаклидаги чўтка киприкларнинг қалинлиги билан мақтана олмайдиганлар учун яхши танлов.
• Агар чўтка эгри бўлса, у киприкларга ҳажм беради ва уларга қайрилган кўриниш беради.
• Қалин чўтка ёрдамида супер ҳажмли киприкларга эришиш мумкин.

Косметик маҳсулотнинг мустаҳкамлиги қуюқ кремга ўхшаш бўлиши керак. Маҳсулот таркибида бўлакларнинг мавжудлиги туш сифатига салбий таъсир кўрсатиши мумкин, уни киприкларга суртиш қийин ва суртилгандан кейин парчалана бошлайди.

Таркиб

Яхши маҳсулот ҳажм қўшиш учун силикон ва минераллардан ташқари, узайтириш учун микрофибер толалар (нейлон ёки ипак), киприкларни қайриш учун қатронлар, шунингдек, фойдали моддаларни ўз ичига олиши мумкин:

• кератин — эластикликни оширади;
• кастор ёғи — ғамхўрлик қилади, киприкларнинг ўсиши ва янгиланишига ёрдам беради;
• жожоба ёғи — озиқлантиради;
• асал муми — порлоқлик билан таъминлайди;
• керосин — сув ўтказмайди.

Қоидага кўра, ишлаб чиқарувчилар ўз маҳсулотига 1-3 йил кафолат беради. Аммо агар туш, масалан, дўконда бирон сабабга кўра виждонсиз харидорлар томонидан очилган бўлса, унда унинг сақлаш муддати кескин 3-6 ойгача камаяди. Найча ичига кирадиган ҳаво унинг қуриб кетишига сабаб бўлади. Шунинг учун, фойдаланувчининг қўли тегмаган маҳсулотни сотиб олиш жуда муҳимдир. Баъзи дўконлар бундай ҳолатларга йўл қўймаслик учун туш идишини ленталар билан муҳрлаб қўяди — бу жуда тўғри қарор бўлиб, ҳеч ким уни очмаслигини таъминлайди.

Сув ўтказмайдиганми ёки оддий туш?

Сув ўтказмайдиган туш ҳар қандай ёмон об-ҳавода, шу жумладан иссиқда ҳам оқиб кетмасликка ёрдам беради, аммо бундай тушни ювиш учун кўпроқ вақт сарфлаш ва махсус воситага мурожаат керак. Шу билан бирга, оддий тушлар линзадан фойдаланадиганлар учун кўпроқ мос келади, чунки у кечқурун кўзнинг қизаришига олиб келмайди.

Сув ўтказмайдиган туш таркибида силикон, парабен ва минерал мум борлиги сабабли косметологлар уни тез-тез ишлатишни маслаҳат бермайди, чунки доимий фойдаланиш аллергияга олиб келиши ва кўзнинг таъсирчанлигини ошириши мумкин.

Ҳовуз ва денгизга саёҳатлар учун идеал бўлган сув ўтказмайдиган туш ўрнига намликка чидамли тушдан фойдаланиш тавсия этилади. Бундай вариантларни бугунги кунда махсус дўконлардан топиш мумкин.

Контакт линзалар фойдаланадиганлар учун эса офталмологлар томонидан синовдан ўтган туш тавсия қилинади. Бундай вариантларни дорихона ёки профессионал косметика ишлаб чиқарадиган брендлардан топиш мумкин.