Ўзбекистон бозорларидаги тарозиларнинг қарийб чорак қисми фойдаланишга яроқсиз экани аниқланди
Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги томонидан ўрганиш ишлари ўтказилди. Натижалар қуйидаги ҳолатларни кўрсатди.
Қайд этилишича, агентликнинг ҳудудий тузилмалари ходимлари томонидан республикадаги 190 дан ортиқ бозорлар ўрганилган. Бу истеъмолчиларга чакана савдони амалга оширувчи 51 мингга яқин савдо мажмуалари ва бозорларнинг савдо жойларини қамраб олган. Хусусан, ўрганишларда қўлланилаётган олти мингга яқин (5981) тарози асбобларидан 1474 таси (24 фоиз ҳолларда) фойдаланишга яроқлилиги тасдиқланмаган. Уларда ўз вақтида кўрикдан ўтказилганини тасдиқловчи белги мавжуд эмас. Бундай тарозилар меъёрда хизмат кўрсата олмаслиги мумкин, ўлчовларнинг аниқлиги ҳам кафолатланмаган.
Агентликка истеъмолчилар томонидан харид қилиш чоғида тарозиларнинг нотўғри ўлчаётгани юзасидан шикоятлар келиб тушмоқда. Истеъмолчи томонидан сотиб олинган маҳсулотлар қайта тортиб кўрилганида вазни кам чиққани маълум бўлган.
Агентликнинг ҳудудий тузилмалари томонидан ўтказилган ўрганишлар давомида сотувчилар томонидан товарларни савдо давомида тарозиларни ўрнатиш талаблари бузилгани ҳам аниқланган. Харидорлар тарозилар ўрнатилган жой атрофи турли товарлар ёки инвентарлар билан тўсиб қўйилгани боис ўлчаб тортиш жараённи кузатишнинг иложи бўлмаган.
Агентлик томонидан ўтказилган ўрганиш натижалари Хоразм вилоятидаги Қўшкўпир деҳқон бозор МЧЖда тарози жиҳозлари ҳолати аянчли экани, бу ердаги мавжуд савдо объектлари умумий сонининг атиги 2 фоизигина савдо марказлари вазн тарозилари билан жиҳозланган, холос.
Қорақалпоғистон Республикаси Нукус шаҳридаги «Нукус деҳқон бозори» акциядорлик жамиятига қарашли деҳқон бозорида фаолият кўрсатаётган умумий савдо марказлари ва шохобчаларининг (1036 та) бор-йўғи 15 фоизи (159 та) да тарозилар бор.
Андижон вилояти Асака тумани деҳқон бозори «Асака деҳқон бозори» масъулияти чекланган жамиятида тарозилар билан жиҳозланиш даражаси атиги 5 фоизни ташкил этади.
Ўрганиш натижаларига кўра, қонун бузилишларни бартараф этиш ҳамда аҳолига хизмат кўрсатиш даражасини ошириш юзасидан бир қатор деҳқон бозорларига тегишли кўрсатмалар берилган.
