АҚШ Вакиллар палатаси спикери Нэнси Пелоси Жанубий Кореяга ташрифи чоғида қуролсизлантирилган ҳудудга бормоқчи, у АҚШ билан биргаликда БМТ ва Шимолий Корея қўмондонлиги томонидан назорат қилинади. Бу ҳақда жанубий кореялик мансабдорга таяниб, Associated Press хабар берди.
Таъкидланишича, Пелоси ушбу ҳудудга 2019 йилдан буён ташриф буюрган АҚШнинг энг юқори мансабли амалдорига айланади. 2019 йилда у ерга Американинг ўша вақтдаги президенти Дональд Трамп борган эди.
Жанубий Кореянинг Yonhap агентлиги аниқлик киритишича, Пелоси 1953 йилда Корея урушига нуқта қўйган ўт очишни тўхтатиш ҳақидаги шартнома имзоланган Пханмунжом қишлоғига боради.
Шунингдек, Жанубий Кореяга ташрифи чоғида Пелоси республика Миллий мажлиси спикери Ким Жин-Пё ва парламентнинг бошқа юқори мансабли аъзолари билан музокаралар ўтказиб, минтақавий хавфсизлик, иқтисодий ҳамкорлик ва иқлим масалаларини муҳокама қилади.
Пелоси кенг муҳокамага сабаб бўлган Тайванга ташрифидан кейин, 3 август куни Жанубий Кореяга етиб келди. Ўзининг Осиё турнеси ҳақида эълон қилаётиб, у Тайванни манзиллардан бири сифатида тилга олмаган эди. Оролга келганидан кейин Пелоси бу ерга ташрифидан мақсад «ёрқин ва динамик» демократияни қўллаб-қувватлаш ва АҚШнинг Тайванни қўллаб-қувватлаш ниятини тасдиқлаш бўлганини айтди.
2 август куни Тайванга АҚШ вакиллар палатаси спикери Нэнси Пелоси Осиё турнеси доирасида етиб келди; ташриф Хитой раҳбарияти томонидан кескин танқидга сабаб бўлди, уни провокация деб аташди. Оқ уй эса Пелосининг ташрифи АҚШнинг Хитойга нисбатан сиёсатида қандайдир ўзгариш бўлганини англатмаслигига ишонтирди.
Изоҳ (0)