Андижон давлат тиббиёт институтига 10 минг доллар эвазига киритиб қўйишни ваъда қилган шахс ушланди

Андижон давлат тиббиёт институтига ўқишга киритиб қўйишни ваъда қилган шахсга нисбатан жиноят иши қўзғатилди. Бу ҳақда Тергов департаменти ахборот хизмати хабар берди.

Маълум қилинишича, 27 июль куни соат 12:00 да 39 ёшли М.А. Андижон шаҳри «Мустақиллик» МФЙ ҳудудида жойлашган «Пушкин» истироҳат боғи олдида 36 ёшли А.Х. билан учрашган. А.Х.нинг жиянини юқори лавозимда ишловчи танишлари орқали Андижон давлат тиббиёт институтига ўқишга олиб кириб қўйишини айтиб, ундан кимёвий ишлов берилган 10 минг доллар пулни олаётган вақтида ИИБ ходимлари томонидан ашёвий далиллар билан қўлга олинган.

Мазкур ҳолат юзасидан Андижон шаҳри ИИО ФМБ ҳузуридаги тергов бўлими томонидан томонидан М.З.га нисбатан Жиноят кодексининг 168-моддаси 3-қисми «а» банди (фирибгарлик) билан жиноят иши қўзғатилиб, у процессуал тартибда ушланган.

Жиноят иши доирасида жиноятнинг келиб чиқиш сабаблари ўрганилиб, ҳуқуқий баҳо берилиши таъминланади. Ҳозирда тергов ҳаракатлари олиб борилмоқда.