Ижтимоий тармоқларда «Саноатқурилишбанк»нинг Бухоро минтақавий филиали раҳбари хизмат хонасида тўкин дастурхон атрофида ўтирган банк масъулларининг овқатланаётгани акс этган видео тарқалди. «Дарё» мухбири ҳолатни ўрганди.
Видеоёзувдан англашилишича, банк масъуллари 2021 йилнинг 20 март куни бир дастурхон атрофида тўпланган. Орадан бир ярим йилча вақт ўтгач, тасвир ижтимоий тармоқларда тарқатилган. Шундан сўнг банкнинг беш нафар масъулларига нисбатан қатъий интизомий чора кўрилиб, меҳнат шартномаси бекор қилинган.
Таъкидланишича, базмда филиалда фаолият юритиб келган ходимлар бўлган.
Филиал раҳбари ўринбосари Қодир Асадовнинг сўзига кўра, базм видеокузатув камерасига тушиб қолган ва номаълум шахс томонидан компьютердаги тасвир қўл телефонига кўчириб олинган.
«Саноатқурилишбанк» вилоят минтақавий филиали раҳбари этиб тайинланганига эндигина бир ой бўлган Шерзод Халилов ўз хизмат хонасида базм уюштирган банк ходимлари жазоланганини билдирди.
«Бундан бир ярим йилча илгари Наврўз байрами арафасида, яъни 2021 йилнинг 20 март, шанба куни банк филиали ходимлари учун ишдан ташқари ҳолатда дастурхон ташкил қилинган бўлган. Ҳақиқатан ҳам бундай базмлар хизмат хоналарида ташкил қилинмаслиги кераклиги ҳаммамизга маълум. Видеотасвир ижтимоий тармоқларда тарқалгач, ҳолат аён бўлди. Раҳбарият билан келишган ҳолда, базм уюштирган масъул ходимларга нисбатан қатъий чора кўрилди. Беш нафар ходим билан тузилган меҳнат шартномаси бекор қилинди. Бундан кейин ҳам бунақа ҳолатларга йўл қўйилмаслиги учун назоратни ўз зиммамизга оламиз», — дейди Шерзод Халилов.
Изоҳ (0)