Сочларнинг жозибали кўриниши учун қилинадиган баъзи ишлар уларга зарар келтириши мумкин. Шунинг учун ҳам иложи борича уларни табиий равишда парвариш қилиш керак. «Новий очаг» нашри сочларга зарар берадиган ишларни ва соч толаларига шикаст етганда қўл келадиган фойдали маслаҳатларни тақдим этди.
Эски, бироқ тоза тароқлардан фойдаланинг
Тиш чўткасини узоғи уч ойда алмаштириш кераклиги барчага маълум. Тароқларни ҳам узоқ муддат ишлатиш керак эмас. Чунки сочлардаги микроб ва бактериялар тароқнинг тишлари орасига тўпланади, бу эса бош терисига ва сочларга зарар етказиши мумкин. Шунинг учун ҳар доим сочингизни тараб бўлганингиздан кейин ундаги соч толаларини олиб ташланг. Тароқни ҳафтада бир марта шампунь ёки истеъмол содаси билан ювинг. Трихологлар тароқни ҳеч қачон бошқага бермасликни маслаҳат беради, шу жумладан тиш чўткасини ҳам ҳаттоки энг яқин инсонингизга берманг.
Сочингиздаги боғични қаттиқ сиқманг
Сочларни боғичда боғлаш кундалик ҳаёт учун зарур, лекин у сочларингизга зарар етказиши мумкин. Агар сиз боғични жуда қаттиқ қилиб қўйсангиз, бош терисидаги қон айланиш тизими бузилади ва бу соч тўкилишининг кучайишига олиб келади. Бундан ташқари кўплаб эластик тасмалар олиб ташланганда сочларни ўзи билан бирга юлиб олади, шунинг учун осон силжийдиган ва шикаст етказмайдиган боғичларни танланг.
Зарур бўлмаса сочингизни кесманг
Стилистлар кўпинча ўз мижозларига камида икки ойда бир марта соч кесишни маслаҳат беради. Аммо кўп қизлар ва аёллар бу қоидани бузади. Агар сочларингизнинг учи бўлиниб кетган бўлса уни қисқартириш керак. Чунки бундай ҳолларда соч толалари заифлашади ва озиқланмайди. Шунинг учун сочларингизнинг соғлом бўлишини ва жозибали кўринишини истасангиз учларини камида бир сантиметрга қисқартиринг. Сочингиз қанчалик узун бўлишидан қатъий назар учларини кестириб туриш керак.
Сочингизга ҳаддан ортиқ эътибор берманг
Яна бир экстремал ҳолат — сочларга ҳаддан ташқари кўп эътибор беришдир. Агар сочингизга тез-тез ниқоб қилсангиз ёки профессионал парвариш қилиш учун гўзаллик салонига мурожаат қилсангиз моддий томондан қийналасиз, бундан ташқари айрим ниқоблар сочингизга ҳам зарар етказади. Сочларни ниқоблар таркибидаги кератин моддаси ўта мўрт қилиб қўяди. Озиқлантирувчи ва намловчи маҳсулотлардан мунтазам фойдаланиш сочларни сезиларли даражада «оғирлаштиради» ва заифлаштиради. Сочларингизга шампунь қўллаганингиздан кейин кондиционер ниқобдан фойдаланинг, бу ҳолат бир ҳафтада бир мартадан ошмасин. Аксарият ниқоблар узоқ муддатли таъсирга эга, шунинг учун сочга зарар бериши мумкин.
Сочингизни турмаклашда дазмолдан фойдаланманг
Агар сиз сочингизни тез-тез дазмолда текисласангиз ёки жингалак қилсангиз сочларингизнинг мўрт, қуруқ бўлиб қолганига ҳайрон қолманг. Иссиқ дазмоллар ёрдамида қилинадиган турмаклар чиройли кўриниши мумкин, бироқ у сочларни куйдиради ва ўсишини ҳам секинлаштиради. Бунга эса ҳеч қандай ниқоблар, шампунлар ёрдам беролмайди. Шунинг учун сиз дазмолдан жуда кам фойдаланишингиз, зарур бўлмаса умуман фойдаланмаслигингиз керак. Қўшимча қилиб айтиш мумкинки, соч қуритадиган фен ҳам соч толаларини заифлаштиради. Қанчалик шошилаётган бўлсангиз ҳам максимал иссиқликда сочларингизни қуритманг.
Ҳимоя спрейларидан фойдаланинг
Иссиқликдан ҳимоя қилувчи спрей шампунь ва бальзамдан кейин жавонингизда туриши керак бўлган биринчи рақамли маҳсулотдир! Термал ҳимоя сочларнинг намлигини сақлаб қолишга ёрдам беради ва ҳақиқатан ҳам шикастланишнинг олдини олади. Спрейдан эҳтиёткорлик билан фойдаланиш керак, уни ҳар бир соч толасига сепиш ўринлидир.
Сочингизни нотўғри тараманг
Узун сочларни илдиздан учигача бир мартада тараш мумкин эмас, чунки бу сочларнинг тўкилишига ва шикастланишига олиб келади. Сочингизни учидан ушлаб таранг. Агар баъзи жойларда сочлар жуда чигал бўлса, дарҳол таралмаса, аввал уларни бармоқларингиз билан секин-секин ажратиб олинг ва қайта таранг.
Нам сочларга эҳтиёткорлик билан муносабатда бўлинг
Соч нам ҳолатда янада заифроқ бўлади. Сув сочни оғирлаштиради, тортилган нам соч толалари тез тўкилиши мумкин. Шунинг учун сочингизни массаж ҳаракатлари билан қуритинг ва тароқда секин-секин таранг.
Лак ва кимёвий маҳсулотларни кўп қўлламанг
Ҳар қандай, ҳаттоки энг яхши кимёвий маҳсулотлар ҳам сочни оғирлаштиради, шу сабабли улардан фойдаланмаслик керак. Ҳамма нарсанинг меъёрида бўлгани яхши. Агар сизнинг сочларингиз ҳеч қандай кимёвий турмакларсиз жозибали кўринишга эга бўлса улардан фойдаланмаслигингиз энг тўғри қарордир.
Шампуньни тўғри танлаш
Одатда инсонлар шампунлардан фойдаланиш ҳақида икки хил фикр билдиради: биринчиси бир ойда бир марта шампунь турини алмаштиришни тўғри деб билса, иккинчиси доим бир хил шампундан фойдаланишни маъқуллайди. Аслида бу ишларнинг иккаласи ҳам хато ҳисобланади. Сочлар ўз ҳолатини ўзгартириб туради ва шунга қараб ҳар хил парвариш қилишни талаб этади. Агар сиз бир йил олдин ёғли сочларга қарши шампундан фойдаланаётган бўлсангиз дарҳол уни алмаштиринг, чунки соч таркибидаги ёғлар вақт ўтиши билан қурийди. Бундан ташқари сочларнинг ҳолати гормонал ўзгаришларга ва бошқа кўп сабабларга боғлиқ бўлиши мумкин. Шунинг учун сочларнинг «кайфиятига» қараб шампунни ўзгартириб туриш керак.
Мавзуга доир:
Изоҳ (0)