Қашқадарё вилоятининг Яккабоғ туманида 38 ёшли аёл бир нечта эркак томонидан калтакланиб, сочи кесиб ташлангани хабар берилганди. Севимли каналининг «Замон» информацион дастурида маълум қилинишича, аёл қамчи билан калтакланган.
«Жабрланувчининг мурожаатига кўра, ҳолатни ўрганиб чиққанимизда воқеа 2022 йилнинг 9 июль куни кечаси соат 23:00 атрофида содир бўлгани аниқланди. Аёл ўзидан 10 ёш кичик йигит билан ишқий муносабатда бўлиб юрган. Бу эса ўғлини уйлантирмоқчи бўлган хонадон эгаси ва йигитнинг қариндошларига маъқул келмаган. Шу боис, аёл ўша йигит хонадонига олиб борилиб, йигитнинг ака-укалари томонидан калтакланган», — дейди Яккабоғ туман ИИБнинг хотин-қизлар масалалари бўйича инспектори Дилафрўз Мирзаева.
Лавҳа муаллифининг аниқлаштиришича, аёлни эри ва унинг қариндошлари калтаклагани ҳақидаги дастлабки маълумот нотўғри.
«Гап шундаки, эридан ажрашган аёлнинг ўзидан ўн ёш кичик бола билан ишқий муносабати йигитнинг ака-укалари ғазабини келтиради. Берилган тушунтиришлар, огоҳлантиришлар кор қилмагач, йигитнинг ака-укалари аёлни жазолашга қарор қилади. Ва аёлни уйига олиб келиб, йигит ва аёлнинг оёқ-қўлини боғлаб, тонгга қадар калтаклашади», — дейди лавҳа муаллифи.
Воқеа содир бўлган «Янги ҳаёт» маҳалласининг хотин-қизлар фаоли Дилшода Умрзоқованинг маълумот беришича, аёл ва ёш йигитнинг қилмиши кўпчиликка маълум бўлгач, уларга тўғри маслаҳат берилган. Аммо фойдаси бўлмаган.
Тонгга қадар калтакланган аёл танишлари кўмагида шифохонага олиб борилган.
«Аёл шифохонамизга оғир аҳволда келтирилганди. Ҳатто саволларимизга ҳам карахт аҳволда жавоб қайтарганди. Синган жойлари йўқ, фақат юмшоқ тўқималарига жароҳат етказилган. Беморда ёпиқ бош мия шикасти, бош мия чайқалиши, бошнинг иккала чакка тепа соҳалари юмшоқ тўқималари лат ейиши ва шилингани кузатилган. Шунингдек, унинг танасида тирналган жароҳатлари бор эди», — дейди шифокор.
Лавҳада қўшимча қилинишича, 28 ёшли йигит ва 38 ёшли аёлнинг муносабатига тўрт йил бўлган.
«Менга унаштирилган қизига телефон қилиб, унинг хотини эканимни айтишимни тайинлади. Ва бу ишни амалга оширдик», — дейди калтакланишига сабаб бўлган воқеа келиб чиқишини изоҳлаган аёл.
Журналист саволларига жавоб берган йигитнинг акаси отасининг топшириғи билан укаси ва аёлни топиб, уйига олиб борганини айтиб, «мен уларни топиб, отамга олиб бориб бердим, қолганини билмайман», дейди.
«Ўзим чавандозман. Олдиндан уйимда қамчи бўлган. Аёл додлади, аммо менинг каллам қизиб кетгани учун чидаб туролмадим», — дейди аёлни қамчи билан калтаклаган ота.
Мазкур воқеа ҳақида фикр билдирган вилоят ҳокими ўринбосари, оила ва хотин-қизлар бошқармаси бошлиғи Комила Каромова аёлнинг ҳуқуқини ҳимоялаш учун судга мурожаат қилинганини айтган.
Эслатиб ўтамиз, аввалроқ мазкур ҳолат юзасидан Яккабоғ тумани ИИБ ҳузуридаги тергов бўлинмаси томонидан фуқаро Ю.Э, Ю.Б ва бошқаларга нисбатан Жиноят кодексининг 138-моддаси 2-қисми «а» (жисмоний азоб бериб, зўрлик ишлатиб ғайриқонуний равишда озодликдан маҳрум қилиш) банди билан жиноят иши қўзғатилгани, ҳозирда тергов ҳаракатлари олиб борилаётгани хабар қилинганди.
Изоҳ (0)