Ўзбекистон ва Туркманистон ўртасида 451 млн долларлик инвестиция ва савдо битимлари имзоланди

Бухорода 13 июль куни биринчи ўзбек-туркман ҳудудлараро форуми бўлиб ўтди, деб хабар бермоқда Инвестициялар ва ташқи савдо вазирлиги матбуот хизмати.

Қайд этилишича, тадбирда икки мамлакат делегацияларига Ўзбекистон томонидан бош вазир ўринбосари — инвестициялар ва ташқи савдо вазири Сардор Умурзоқов, Туркманистон томонидан Вазирлар Маҳкамаси раисининг ўринбосари Ботир Атдаев раҳбарлик қилди. Делегациялар таркибига икки мамлакат вазирликлари, идоралари, тармоқ бирлашмалари, тижорат банклари, савдо-саноат палаталари раҳбарлари, маҳаллий маъмуриятлар раҳбарлари ҳамда ишбилармон доиралар вакиллари кирди.

Томонлар ҳудудлараро алоқаларни мустаҳкамлаш ва иқтисодий самарадорлиги юқори бўлган ташаббусларни биргаликда ривожлантириш муҳимлигини таъкидлаб, бу борада қўшма амалий чора-тадбирларни кўришга тайёр эканликларини билдирди. Бундан ташқари, вазифалари ҳудудлар ўртасида ҳамкорликнинг янги йўналишларини кашф этиш, истиқболли лойиҳаларни ишлаб чиқиш ва мувофиқлаштириш, уларни ҳаётга татбиқ этиш билан боғлиқ барча масалаларни ҳал қилишдан иборат бўлган доимий ишчи гуруҳлар ташкил этилиши маълум қилинди.

Форум иштирокчилари инвестициявий, саноат ва савдо муносабатларини ривожлантириш учун қишлоқ хўжалиги, автомобилсозлик, кимё, тўқимачилик, чарм-пойабзал ва электротехника саноати каби энг истиқболли йўналишларга эътибор қаратди.

Ҳудудлараро алоқаларни ривожлантириш нуқтаи назаридан чегараолди савдо зоналарини фойдаланишга топшириш, савдо уйларини очиш ҳамда юқори технологияли ишлаб чиқариш корхоналарини ташкил қилишга қаратилган қўшма лойиҳаларни амалга оширишни жадаллаштириш муҳимлиги таъкидланди.

Бундан ташқари, тадбир доирасида иштирокчиларнинг «B2Г» ва «B2B» форматидаги учрашувлари ҳамда икки томонлама ҳужжатларни имзолаш маросими бўлиб ўтди. Форум якунида умумий қиймати 451 миллион долларлик инвестиция ва савдо битимлари имзоланди.

Маълумот учун, ушбу форум Туркманистон президентининг Ўзбекистонга ташрифи арафасида бўлиб ўтди. Туркманистон президенти Сердар Бердимуҳамедов Шавкат Мирзиёев таклифига биноан 14 июль куни Ўзбекистонга келди.