Самарқанд вилояти Самарқанд шаҳрида 22 июнь куни фуқаролар Йўл-патруль хизмати ходимининг қонуний талабларига бўйсунмай, қаршилик кўрсатди. Бу ҳақда вилоят Ички ишлар бошқармаси хабар қилди.
Қайд этилишича, ҳолат шу куни шаҳарнинг Мирзо Улуғбек ва Мирсаид Барака кўчалари чорраҳасида содир бўлган. Ҳудудда хизмат олиб бораётган ЙПХ инспектори пиёдалар ўтиш жойига қўйилган Cobalt автомашинасига кўзи тушган. Машина олдига бориб, салондаги тўрт нафар йўловчига транспорт воситаси ҳайдовчисини чақиришни, автомобилни пиёдалар ўтиш йўлагидан олишни ва тегишли ҳужжатларни тақдим этишни сўраган.
Шунда ҳайдовчининг қариндошлари бўлган йўловчилар жанжал кўтариб, ходимга кескин қаршилик кўрсатган. Инспекторнинг қўлидаги тўхтатиш таёғи, яъни жезлни тортиб олиб, синдириб ташлаган. Ходимга тан жароҳати етказган.
Ҳолат юзасидан суриштирув ва текширув ҳаракатлари олиб борилган. Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, 2 нафар фуқарога қамоқ эҳтиёт чораси қўлланилган.
Бундан ташқари, яна 2 нафарининг ҳаракатларида ҳуқуқбузарлик аломатлари борлиги сабабли 15 сутка маъмурий қамоқ жазоси тайинланган.
Мавзуга доир:
- Бухорода жарима тўловидан бош тортиб, МИБ ходимларини дўппослаган фуқаро икки йил муддатга озодликдан маҳрум қилинди
- Андижонда уч нафар шахс ЙПХ ходими билан жанжаллашиб, рацияси, нишони ва планшетини олиб қўйди
- Самарқандда ИИБ ходими погонини ўзи юлиб, бунда ёнидаги аёлни айблагани кўринган видео тарқалди. Вазирлик ҳолат ўрганилаётганини маълум қилди
Изоҳ (0)