Қорақалпоғистон Республикасининг Нукус шаҳрида бўлиб ўтган тартибсизликлар пайтида «Мени Қорақалпоққа бош қилиб, изимдан юришингизни сўрайман», дея халқни митингга чорлаган журналист ва блогер Конституциявий тузумга тажовузда айбланмоқда. Бу ҳақда Бош прокуратура маълум қилган.
Терговда аниқланишича, 2022 йил 1 июль куни соат 14:50 да «Эл хизметинде» газетаси муҳаррири ва блогер Даулетмурат Тажимуратов Telegram’даги «Makan.uz» канали орқали видеомурожаат йўллаб, видеомурожаатида фуқароларни жорий йилнинг 5 июль куни соат 17:00 да Қорақалпоғистон Республикасининг озодлигини сўраб Жўқорғи Кенгес биноси олдида митинг ўтказишга даъват қилган.
Шундан кейин ижтимоий тармоқлар орқали қонунга хилоф равишда митинг уюштиришга фуқароларни даъват қилганлиги учун 2022 йил 1 июль куни соат 15:30 да Даулетмурат Тажимуратов Нукус шаҳар ИИО ФМБга олиб келинган ва ушланган.
«Блогер Даулетмурат Тажимуратовнинг ИИБ ходимлари томонидан ушлаганлигини билган бир гуруҳ шахслар тартибсизликлар уюштириб, уни озод қилишни талаб қилиб Нукус шаҳридаги ИИВга қарашли 2-сонли тергов ҳибсхонасига ва Нукус шаҳар ИИО ФМБга борган. Кейинчалик 2022 йил 1 июль куни соат 17:30 да Нукус шаҳри марказидаги ‘Марказий деҳқон бозори’ МЧЖ олдидаги автомобиль йўлида тартибсизликлар уюштиришган. Шундан кейин Д.Тажимуратов Нукус шаҳар ИИО ва ФМБдан озод қилиниб, чиқариб юборилган. Шундай бўлса-да, Д.Тажимуратов ва унинг тарафдорлари тартибсизликларни яна давом эттириб, ҳуқуқни муҳофаза қилувчи идоралар ходимларига фаол қаршилик кўрсатиб, Ўзбекистон Республикасининг амалдаги давлат тузумини Конституцияга хилоф тарзда ўзгартиришга ва ҳокимиятни босиб олишга очиқдан очиқ даъват қилишган», — дейилади Бош прокуратура ахборотида.
Қўшимча қилинишича, 2022 йил 2 июль куни соат 14:45 да Нукус туманидан тахминан 300 нафар шахс Нукус шаҳар томон ҳаракатланиб, ҳуқуқни муҳофаза қилувчи идоралар ходимларининг қонуний талабларига бўйсунмасдан, Нукус шаҳридаги блокпостда хизмат олиб бораётган 50 нафар Миллий гвардия ходимининг махсус воситаларини (рация, дубинка, каска, шумовая граната, шит) қўлга киритган.
«Шу куни Хўжайли туманидаги ҳарбий постга номаълум шахслар томонидан ҳужум уюштирилиб, қурол-яроғ тортиб олинган. Нукус халқаро аэропортига, Нукус шаҳридаги маъмурий қамоққа олинган шахслар сақланувчи Реабилитация марказига, Нукус шаҳар ИИБ биносига ҳужумлар уюштирилган», — дейилади масъул ташкилот ахборотида.
Эслатиб ўтамиз, аввалроқ Нукусдаги оммавий тартибсизликлар оқибатида 500 дан ортиқ фуқаро қўлга олингани хабар берилганди.
Изоҳ (0)