Шольц Россияга қарши киритилган санкцияларни бекор қилиш шартини айтди

Украина атрофидаги вазият юзасидан Россияга қарши киритилган санкциялар Москва Киев билан «адолатли келишув»га эришмагунча кучда қолади, деди Германия канцлери Олаф Шольц АРД телеканали эфирида. Бу ҳақда Welt нашри хабар берди.

Унинг таъкидлашича, фақатгина Украина ўзи учун нима адолатли эканини ҳал қилиши мумкин, Ғарб давлатлари эса уни Россия билан шартнома тузишга ундамайди. «Европада ҳеч ким буни буюришга қодир ҳам эмас, истамайди ҳам», — деди Шольц.

Шольцнинг таъкидлашича, Россия президенти Владимир Путин билан суҳбатларда у «мажбуран қабул қилинган тинчлик»нинг номақбул экани ҳақида бир неча бор гапирган.

У, шунингдек, «Германия Қримнинг аннексиясини қабул қилмаслигини», чунки «бу халқаро ҳуқуқнинг бузилиши эканини» айтди.

Аввал ҳам Шольц Россияга қарши санкцияларни бекор қилиш Украина билан келишув тузилган тақдирдагина мумкин бўлишини айтган эди. Германия ташқи ишлар вазири Анналена Бербок, ўз навбатида, ўт очишни тўхтатиш ва Россия қўшинларининг Украина ҳудудидан олиб чиқиб кетилишини чекловларни бекор қилиш шарти деб атаган.

Кейинроқ Шольц Украинадаги жанговар ҳаракатлар тўхтатилгач, вазият нормал ҳолатга қайтмагунча, Россияга нисбатан чекловлар бекор қилинмаслигини маълум қилган. Унинг фикрича, Москва Киевга тинчлик шартларини мажбуран буюра олмаслигини тушуниши керак. У Украина билан унинг ҳудудий яхлитлиги ва суверенитетини кафолатлайдиган мулоқотни амалга ошириши зарур.

Россия Ташқи ишлар вазирлиги раҳбари Сергей Лавров Ғарбнинг санкциялардан воз кечишига шубҳа билдирган эди. Унинг сўзларига кўра, чеклов чоралари «бир кечада тузилмаган», аксинча узоқ вақт давомида тайёрланган. Путин Европа Иттифоқи давлатларини санкциялар босими давом этишининг «қайтариб бўлмас оқибатлари» ҳақида огоҳлантирган эди. Май ойи бошида у жавоб чораларини қўллаш тўғрисидаги фармонни имзолади.