Хитой учинчи миллий авиаташувчи кемаси «Фуцзян»ни сувга туширди

Хитой давлат кемасозлик корпорацияси учинчи миллий авиаташувчи «Фуцзян»ни сувга туширди, дея хабар бермоқда Хитой марказий телевидениеси.

Кема мамлакатнинг шарқий қисмида жойлашган Фуцзян провинцияси номи билан аталган. Уни сувга тушириш маросими Шанхайдаги Сзяннан кемасозлик заводида бўлиб ўтди.

Бу Хитойнинг самолёт ва учар аппаратларни учириш учун электромагнит катапульт билан жиҳозлаб ясаган биринчи авиаташувчидир. Хитойнинг Ҳкет портали таъкидлашича, бундай технология ҳозирда фақат АҚШ денгиз флоти ва Хитой денгиз флоти томонидан қўлланилмоқда, «Фуцзян»нинг ўзини эса «конфигурация бўйича АҚШнинг энг яхши авиаташувчиси билан солиштириш мумкин». Гап Американинг қайси кемаси ҳақида кетаётганига портал аниқлик киритмаган.

Сина портали «Фуцзян» АҚШ ҳарбий-денгиз кучларининг «Жеральд Форд» тоифасидаги авиаташувчи кемаларига ўхшашлигини таъкидламоқда. Кема 2024 йилгача денгиз флотига кириши керак. У Ж-35 қирувчи самолётлари ва Хитой ҳозирда ишлаб чиқараётган КЖ-600 олдиндан радиолокацион огоҳлантирувчи палубали самолётларни олиб юриши кутилмоқда. Ж-15Т қирувчи самолётлари ва Ж-15Д радиоэлектрон кураш самолётлари ҳам ундан уча олади.

Хитойнинг биринчи иккита миллий авиаташувчиси «Ляонин» ва «Шандун» деб номланади — улар ҳам провинциялар шарафига ном олган. Улардан учаётган самолётлар махсус трамплиндан фойдаланади. Иккала кема ҳам совет моделига мувофиқ қурилган.