Ukraina atrofidagi vaziyat yuzasidan Rossiyaga qarshi kiritilgan sanksiyalar Moskva Kiyev bilan “adolatli kelishuv”ga erishmaguncha kuchda qoladi, dedi Germaniya kansleri Olaf Shols ARD telekanali efirida. Bu haqda Welt nashri xabar berdi.
Uning ta’kidlashicha, faqatgina Ukraina o‘zi uchun nima adolatli ekanini hal qilishi mumkin, G‘arb davlatlari esa uni Rossiya bilan shartnoma tuzishga undamaydi. “Yevropada hech kim buni buyurishga qodir ham emas, istamaydi ham”, — dedi Shols.
Sholsning ta’kidlashicha, Rossiya prezidenti Vladimir Putin bilan suhbatlarda u “majburan qabul qilingan tinchlik”ning nomaqbul ekani haqida bir necha bor gapirgan.
U, shuningdek, “Germaniya Qrimning anneksiyasini qabul qilmasligini”, chunki “bu xalqaro huquqning buzilishi ekanini” aytdi.
Avval ham Shols Rossiyaga qarshi sanksiyalarni bekor qilish Ukraina bilan kelishuv tuzilgan taqdirdagina mumkin bo‘lishini aytgan edi. Germaniya tashqi ishlar vaziri Annalena Berbok, o‘z navbatida, o‘t ochishni to‘xtatish va Rossiya qo‘shinlarining Ukraina hududidan olib chiqib ketilishini cheklovlarni bekor qilish sharti deb atagan.
Keyinroq Shols Ukrainadagi jangovar harakatlar to‘xtatilgach, vaziyat normal holatga qaytmaguncha, Rossiyaga nisbatan cheklovlar bekor qilinmasligini ma’lum qilgan. Uning fikricha, Moskva Kiyevga tinchlik shartlarini majburan buyura olmasligini tushunishi kerak. U Ukraina bilan uning hududiy yaxlitligi va suverenitetini kafolatlaydigan muloqotni amalga oshirishi zarur.
Rossiya Tashqi ishlar vazirligi rahbari Sergey Lavrov G‘arbning sanksiyalardan voz kechishiga shubha bildirgan edi. Uning so‘zlariga ko‘ra, cheklov choralari “bir kechada tuzilmagan”, aksincha uzoq vaqt davomida tayyorlangan. Putin Yevropa Ittifoqi davlatlarini sanksiyalar bosimi davom etishining “qaytarib bo‘lmas oqibatlari” haqida ogohlantirgan edi. May oyi boshida u javob choralarini qo‘llash to‘g‘risidagi farmonni imzoladi.
Izoh (0)