Еврокомиссия маълум шартлар асосида Украина, Молдова ва Грузияга Европа Иттифоқига аъзолик учун номзод мақомини беришни тавсия қилмоқчи. Бу ҳақда Bloomberg муҳокамадан хабардор манбаларга таяниб ёзди.
Кўриб чиқилаётган шартлар мамлакатлар қонунчилигининг муайян стандартларга мувофиқлиги, қонун устуворлиги ва коррупцияга қарши кураш билан боғлиқ.
Еврокомиссия ўз қарорини 17 июнь, жума куни эълон қилишни режалаштирмоқда. Европа Иттифоқига номзод давлат мақомини бериш учун иттифоқ таркибига кирувчи барча 27 давлатнинг қўллаб-қувватлови талаб қилинади.
16 июнь куни Франция президенти Эммануэль Макрон Киевга ташрифи чоғида Франция, Германия, Италия ва Руминиянинг Украинага зудлик билан Европа Иттифоқига номзод давлат мақомини бериш тарафдори эканини айтди.
Аввалроқ Италия бош вазири Марио Драги «Европа Иттифоқининг деярли барча йирик давлатлари Украинага ЕИ аъзолигига номзод мақомини беришга қарши» экани ҳақида гапирган.
Украина Россия босқини бошланганидан бир неча кун ўтиб Европа Иттифоқига қўшилиш учун ариза берди. Россия дастлаб Украинанинг ЕИга киришига эътироз билдирмади, бироқ кейинчалик муносабатини ўзгартирди. Россия ташқи ишлар вазирлиги вакиллари Украинанинг Европа Иттифоқига қўшилиш истагининг зарарсизлигига ҳам, унинг ЕИга қабул қилиш истиқболларига ҳам шубҳа қилишини айтди.
Изоҳ (0)