Ўзбекистон ҳудудларида тез тиббий ёрдам бўйича ягона Call-марказлар фаолияти йўлга қўйилади

Президентнинг «Аҳолига тез тиббий ёрдам кўрсатиш тизимини такомиллаштириш тўғрисида»ги қарорига асосан, ҳудудларда тез тиббий ёрдам бўйича Call-марказлар ташкил этилади. Бу ҳақда Соғлиқни сақлаш вазирлиги хабар қилди.

Қайд этилишича, соғлиқни сақлаш тизими ходимларининг белгиланган умумий чекланган сони ҳамда давлат бюджетидан ажратилган маблағлар доирасида марказ ва унинг ҳудудий филиаллари, Республика шошилинч тиббий ёрдам илмий маркази ва унинг ҳудудий филиаллари, марказий туман (шаҳар) шифохоналари ҳамда ССВ тизимидаги автохўжаликларнинг янгиланган штат нормативларини ишлаб чиқиши ва 2022 йил 1 сентябрга қадар тасдиқланиши белгиланган.

Шунингдек, тез тиббий ёрдам сифатини яхшилаш ва аҳолига янада яқинлаштиришга оид дастур ҳамда тизимдаги мавжуд автотранспорт воситалари паркини босқичма-босқич янгилаш кўзда тутилган.

Бундан ташқари, 2023 йил 1 сентябрга қадар: Соғлиқни сақлаш вазирлиги, Ахборот технологиялари ва коммуникацияларини ривожлантириш вазирлиги, Молия вазирлигининг тез тиббий ёрдам бўйича электрон автоматлаштирилган бошқарув тизими Тошкент шаҳри тажрибаси асосида республиканинг бошқа ҳудудларида тўлиқ жорий қилинади.

Бунда, 2022 йил 1 декабрга қадар:

• Андижон, Жиззах, Самарқанд ва Сурхондарё вилоятлари;

2023 йил 1 сентябрга қадар:

• Қорақалпоғистон Республикаси, Бухоро, Қашқадарё, Навоий, Наманган, Сирдарё, Тошкент, Фарғона ва Хоразм вилоятлари туман (шаҳар)ларидаги диспетчерлик хизматлари тугатилиб, Тошкент шаҳри тажрибаси асосида марказнинг ҳудудий филиалларида ягона Call-марказлар фаолияти йўлга қўйилади.

Эслатиб ўтамиз, Шавкат Мирзиёев 5 май куни шошилинч ва тез тиббий ёрдам сифатини яхшилаш масалаларига доир видеоселектор йиғилиши ўтказган. Унда тез тиббий ёрдам соҳаси олдида турган вазифаларни белгилаб бериб, жумладан, туманларда чақирувларни қабул қилиш диспетчерлик хизмати тугатилиб, вилоятларда ягона Салл-марказ ташкил этилишини айтганди.