«Унга мисли кўрилмаган сиёсий ва иқтисодий босим ўтказилди». Флорентино Перес Мбаппенинг барбод бўлган трансфери ҳақида

«Реал» президенти Флорентино Перес «ПСЖ» ҳужумчиси Килиан Мбаппе ва унинг Мадрид клубига амалга ошмаган трансфери ҳақида гапирди.

«Реал»нинг эшиклари доим очиқлиги ҳақида

«Реал Мадрид» нималигини тушунадиган ва унинг клубдан юқори бўла олмаслигини тушунадиган футболчилар учун Мадрид эшиклари доим очиқ.

Мбаппенинг янги шартномаси рақамларини билмаслиги ҳақида

Унга кўпроқ сиёсий босим таъсир қилди. Ваҳимага тушганингизда, сизни ваҳимадан халос этадиган йўлни танлайсиз. У ваҳимага тушиб қолганди.

У пулни танладими? Нафақат, балки қулай йўл ва клубдаги янги ролни ҳам танлади.

Мбаппенинг фикрини нима ўзгартиргани ҳақида

Мбаппенинг фикри бир сабабга кўра ўзгарди. Унга иқтисодий босим билан мустаҳкамланган мисли кўрилмаган сиёсий босим ўтказилди.

Сиёсий босим ҳақида

Испания қиролининг исталган футболчига босим ўтказиш учун қўнғироқ қилишини тасаввур қила оламизми? Мбаппе икки давлат томонидан босим остида қолди ва уни чалкаштириб юборишга муваффақ бўлишди.

Аммо такрор айтаман — биз кўрган Мбаппе Мадридга керак эмас. Мбаппенинг Франция федерацияси билан имиж ҳуқуқи бўйича муаммолари борлигини билганимда ҳайратда қолдим. Бу аввалги, менинг Мбаппемга ўхшамасди.

Франция президентининг Мбаппега ўтказган босими ҳақида

Биз Макрон Мбаппега доимий равишда қўнғироқ қилиб, алоқада бўлиб турганини биламиз. У босим ўтказди.

Мбаппе унга қарорини шахсан ўзи айтгани ҳақида

Мбаппе ўз қарори ҳақида шахсий хабар орқали маълум қилди, аммо ўшанда менга барибир эди. Ҳеч ким бизнинг клубдан юқори бўла олмайди.

Ҳамон Мбаппени яхши кўриши ҳақида

Мбаппени ҳали ҳам яхши кўраман, лекин охирги пайтларда уни мен «Реал Мадрид»га олиб келмоқчи бўлган ўйинчи сифатида кўрмаяпман.

Ҳеч бир ўйинчи ҳеч қачон «Реал»дан юқори бўла олмайди.

Нима учун Мбаппе билан 2022 йилнинг январида шартнома имзоланмагани ҳақида

Январда у билан шартнома имзолай олмасдик. Бу учун ҳар икки томоннинг розилиги талаб қилинарди.

Трансфернинг амалга ошмагани мухлисларни ранжитгани ҳақида

Мухлисларнинг ҳафсаласи пир бўлди, буни тушунаман. Лекин у энди мен «Реал»га олиб келмоқчи бўлган Мбаппе эмас. Менимча, у босим туфайли фикрини ўзгартирди, лекин агар ҳақиқатан ҳам шундай бўлса, «ПСЖ»да қолаверсин.

«Реал»га ўтиш — Мбаппенинг орзуси деб ўйлагани ҳақида

«Реал» — Мбаппенинг орзуси эканлигига ишонгандим. Онаси ҳам бу трансферга рози деб ўйлагандим, чунки у ўғлининг орзусини биларди. 3 йилдан кейин нима бўлади? Узоқни кўра олмаймиз.

Сизга шуни айтмоқчиманки, бу энди мен клубга олиб келмоқчи бўлган Мбаппе эмас.

Мбаппенинг сотқин эмаслиги ҳақида

Мбаппе сотқинми? Менимча, бу масалани бу тарзда кўриб чиқиш нотўғри. У ҳеч кимга хиёнат қилмади. Лекин ҳақсиз. Биз буни кутмаганимиз аниқ. Мбаппе ўз орзусини сотди.

Килианнинг келажакда «Реал» келиш эҳтимоли ҳақида

Мбаппе ҳозир «ПСЖ» футболчиси. Бир неча йил ичида нималар бўлиши мумкинлигини кўрамиз. Биз ҳар доим таркибимизни яхшилашни хоҳлаймиз.

Флорентино Перес, «Реал» президенти