Душанбе—Тошкент—Душанбе йўналишидаги 301/302-сонли йўловчи поезди 20 июндан бошлаб ҳаракатланишни бошлайди. Бу ҳақда «Ўзбекистон темир йўллари» хабар қилди.
Қайд этилишича, мазкур поезд Душанбедан ҳафтанинг душанба кунлари жўнаб кетади ва сешанба кунлари соат 13:43 да Тошкентга етиб келади. Тошкентдан ҳафтанинг ҳар сешанба куни соат 16:15 да жўнаб кетиб, Душанбега чоршанба куни етиб боради.
Тошкентдан Душанбегача темир йўл орқали бўлган масофа 916 километрни ташкил этади. Поезд 21 соат давомида ҳаракатланади.
Поезд 10 та вагон: 4 купе, 5 плацкарт ва вагон-ресторандан иборат.
Сотув муддатига қараб чегирмаларни ҳисобга олган ҳолда чипта нархи 381 минг 476 сўмдан бошланади.
Маълумот учун, Душанбе—Тошкент йўналиши бўйича йўловчи поездлари ҳаракати 1990 йиллар бошида тўхтатиб қўйилган. 2 июнь куни Тошкентда ўтказилган Ўзбекистон ва Тожикистон президентларининг қўшма брифингида поезд қатновини тиклаш бўйича келишувга эришилган.
Эслатиб ўтамиз, 2021 йилнинг октябрида Тошкент–Хўжанд–Тошкент халқаро автобус йўналишида мунтазам қатновлар қайта тикланганди. 2022 йилнинг апрелида эса Ўзбекистон ва Тожикистон ўртасидаги қатор автобус қатновлари тажриба-синов тариқасида тикланган.
Изоҳ (0)