2022 йилнинг ўтган даврида интернет тармоғи орқали тарқатилган гиёҳвандлик воситалари ва психотроп моддаларнинг ноқонуний савдоси билан боғлиқ бир нечта факт фош этилди, деб хабар беради ИИВ матбуот хизмати.
Таъкидланишича, кўпчилик ушбу мақсадлар учун Telegram мессенжеридан фойдаланмоқда. Пойтахт аҳолиси, журналистлар ва блогерлар бир неча маротаба ички ишлар органлари ахборот хизматларига турли бинолар деворларига гиёҳвандлик воситалари ва психотроп моддаларни тарқатишда қатнашганлар томонидан қолдирилган графити фотосуратларини бот ёки Telegram каналга ҳавола билан юборган. Тезкор ходимлар тақиқланган моддаларни сотадиган сайтларни яширин реклама қилиш ҳолатларига дуч келишган.
«Бу каби ҳар бир хабарни текшириш жуда машаққатли ва мураккаб иш, чунки ушбу платформада махфий суҳбат имконияти мавжуд ва трафикни шифрлашдан фойдаланилади. Бироқ ички ишлар органлари тезкор ходимлари жиноятчиларни аниқлашга муваффақ бўлмоқда», — дейилади хабарда.
Қайд этилишича, Ўзбекистонда 2022 йил бошидан бери турли хил ижтимоий тармоқлар ва тезкор хабарлар орқали деворларга чизиб кетилган 70 дан ортиқ реклама электрон манзиллари ўчиртирилган.
«Агар гиёҳвандлик воситалари ёки психотроп дилерларга боғлиқ граффитини кўриб қолсангиз, уни суратга олинг, фотосуратни ҳуқуқни муҳофаза қилиш идораларига топширинг ва ёзувнинг ўзини ўчиринг. Ҳуқуқни муҳофаза қилиш органлари ходимлари граффити ‘манзилини’ текширувга олишади, сиз эса уни ўчириб ташлаш орқали нафақат тажовузкорларнинг ҳаракатларини бекор қиласиз, балки бировнинг ҳаётини сақлаб қоласиз», — дея таъкидланади хабарда.
Эслатиб ўтамиз, сўнгги йилларда гиёҳванд моддалар тўғрисида реклама вақти-вақти билан Тошкентнинг турли туманларида пайдо бўлаётгани ҳақида хабар берилган эди. Шу сабабли АОКА ИИВ билан биргаликда @stopnarko_bot Telegram ботини ишга туширди. Гиёҳванд моддалар рекламаси ҳақида ушбу Telegram бот орқали хабар бериш мумкин.
Изоҳ (0)