Тошкентда ўтказилган футбол ўйинида стадионга тош отганларнинг 16 нафари қамалди

Тошкент шаҳар ИИББ «Пахтакор» стадионида ўтказилган футбол мусобақасида томошабинлар томонидан стадионга тош отиш ҳолатлари кузатилгани, натижада бир нафар шахс жароҳатлангани тўғрисида тарқалган хабарларга муносабат билдирди.

11 июнь куни соат 21:00 да Тошкент шаҳридаги «Пахтакор» стадионида Осиё кубоги ўйинлари доирасида 23 ёшгача бўлган футболчилардан иборат Ўзбекистон ва Ироқ терма жамоалари ўртасидаги футбол ўйини бўлиб ўтди. Ўйиннинг 12-дақиқасида ҳакам томонидан Ўзбекистон терма жамоасининг дарвозабонига қизил карточка кўрсатилиб, 11 метрлик жарима тўпи белгиланганда, мухлислар норози бўлиб, стадионга пластмасса сув идиши ва стакан, оёқ остидаги бетон парчаларини улоқтирган.

Натижада стадионда фотомухбир бўлиб хизмат олиб бораётган 30 ёшли Ж.С. қорин бўшлиғидан жароҳат олган. Унга зудлик билан тиббий ёрдам кўрсатилган. Жабрланувчининг аҳволи яхши бўлгани сабабли шу куни касалхонадан чиққан.

Маълум қилинишича, мазкур ҳолат юзасидан Тошкент шаҳар ИИББ томонидан текширув ўтказилмоқда. Текширув давомида жамоат тартибини бузган 47 нафар шахс аниқланиб, уларнинг 6 нафари: 24 ёшли А.Фахриддин, 31 ёшли Т.Сарвар, 28 ёшли Б.Тўхтамурод, 19 ёшли Ж.Беҳзод, 20 ёшли V.Мехрож, 24 ёшли Х.Аброрга суд томонидан 15 сутка маъмурий қамоқ жазоси тайинланган.

Бундан ташқари, 10 нафар фуқарога 10 сутка маъмурий қамоқ, 3 нафарига жарима жазоси белгиланган, 28 нафарига нисбатан эса суриштирув давом этмоқда. Шунингдек, фуқаро Ж.С. унга нарса отган шахсга нисбатан даъвоси йўқлигини маълум қилган ва ариза ёзишдан бош тортган.

Аввалроқ Тошкент шаҳридаги «Пахтакор» стадионида футбол бўйича U-23 Осиё кубоги чорак финали доирасида Ўзбекистон—Ироқ ўйинини ёритишга борган «Севимли» телеканали мухбири ва тасвирчисига ички ишлар органлари ва Миллий гвардия ходимлари томонидан куч ишлатилгани, камераси тортиб олингани ҳақида хабар берилганди.