Тошкент шаҳрининг Яшнобод туманида жойлашган бозор масъул ходими тадбиркордан 8,5 минг доллар пора олган вақтида қўлга олинди, деб хабар беради ЎзА.
Маълум қилинишича, Тошкент шаҳрининг Яшнобод туманида жойлашган «Янгиобод ихтисослашган бозори» МЧЖнинг масъул ходимларидан бири тадбиркорлик билан шуғулланмоқчи бўлган фуқарога бозорнинг харидорлар гавжум бўладиган ҳудудидан савдо дўкони олиб бериш эвазига 10 минг доллар талаб қилган.
ДХХнинг Тошкент шаҳар бўйича бошқармаси ходимлари томонидан Иқтисодий жиноятларга қарши курашиш департаментининг шаҳар бошқармаси ходимлари билан ҳамкорликда ўтказилган тезкор тадбирда, у олдиндан 8,5 минг долларни олган вақтида ашёвий далиллар билан ушланган.
Ҳозирда ҳолат юзасидан мазкур шахсга нисбатан Жиноят кодексининг 168 (фирибгарлик) ва 28, 211-моддалари (пора бериш) билан жиноят иши қўзғатилган.
Апрель ойида Тошкентдаги «Фарҳод» деҳқон бозори директори ва унинг ўринбосари товламачиликда айбланиб қўлга олинганди. Аниқланишича, бозор раҳбарияти пулни тўламаганларни бозордан чиқариб юбориш билан қўрқитиб, 2021 йил сентябрь ойидан буён ҳар 10 кунлик савдо фаолияти учун 660 минг сўмдан пул маблағларини кассир орқали олиб келган.
Мавзуга доир:
Изоҳ (0)