8—9 июнь кунлари БМТ Бош котибининг биринчи ўринбосари Амина Муҳаммад Ўзбекистонга ташриф буюради. Бу ҳақда ТИВ матбуот хизмати хабар берди.
Ташриф доирасида Олий Мажлис Сенати ва Ёшлар ишлари агентлигида музокаралар, шунингдек, Ўзбекистондаги етакчи-аёллар билан учрашувлар ўтказилиши кўзда тутилган. Шунингдек, мулоқотларда Ўзбекистон— БМТ билан ҳамкорлигининг долзарб масалалари муҳокама қилинади.
БМТ сайтида қайд этилишича, Амина Муҳаммад 5—12 июнь кунлари Марказий Осиё бўйлаб сафарни амалга оширмоқда. У Тожикистонда бўлиб ўтадиган 2018—2028 йилларда «Барқарор ривожланиш учун сув» ҳаракатининг ўн йиллигига бағишланган иккинчи юқори даражадаги халқаро конференцияда бош котиб номидан иштирок этади.
БМТ бош котибининг биринчи ўринбосари минтақадаги бошқа давлатларнинг таклифига биноан Туркманистон, Қозоғистон ва Қирғизистонга ҳам боради.
Аввалроқ Шавкат Мирзиёев ШҲТ бош котиби билан Самарқандда ўтказиладиган саммит масалаларини муҳокама қилгани, Владимир Норов АҚШ давлат котибининг ёрдамчиси билан учрашгани тўғрисида хабар берилганди.
Изоҳ (0)