8—9-iyun kunlari BMT Bosh kotibining birinchi o‘rinbosari Amina Muhammad O‘zbekistonga tashrif buyuradi. Bu haqda TIV matbuot xizmati xabar berdi.
Tashrif doirasida Oliy Majlis Senati va Yoshlar ishlari agentligida muzokaralar, shuningdek, O‘zbekistondagi yetakchi-ayollar bilan uchrashuvlar o‘tkazilishi ko‘zda tutilgan. Shuningdek, muloqotlarda O‘zbekiston— BMT bilan hamkorligining dolzarb masalalari muhokama qilinadi.
BMT saytida qayd etilishicha, Amina Muhammad 5—12-iyun kunlari Markaziy Osiyo bo‘ylab safarni amalga oshirmoqda. U Tojikistonda bo‘lib o‘tadigan 2018—2028-yillarda “Barqaror rivojlanish uchun suv” harakatining o‘n yilligiga bag‘ishlangan ikkinchi yuqori darajadagi xalqaro konferensiyada bosh kotib nomidan ishtirok etadi.
BMT bosh kotibining birinchi o‘rinbosari mintaqadagi boshqa davlatlarning taklifiga binoan Turkmaniston, Qozog‘iston va Qirg‘izistonga ham boradi.
Avvalroq Shavkat Mirziyoyev SHHT bosh kotibi bilan Samarqandda o‘tkaziladigan sammit masalalarini muhokama qilgani, Vladimir Norov AQSH davlat kotibining yordamchisi bilan uchrashgani to‘g‘risida xabar berilgandi.
Izoh (0)