Исроил армияси Ливан пойтахти Байрутга “мақсадли зарба” бергани, шунингдек, “Ҳизбуллоҳ” қўмондони Иброҳим Оқил ўлдирилганини маълум қилди.
Ливан расмийларига кўра, ҳужум оқибатида камида 12 киши ҳалок бўлган, 100 га яқин киши жароҳатланган.
Исроил армияси маълумотларига кўра, зарбада “Ҳизбуллоҳ”нинг ал-Ҳаж Радван кучларига (Ливан гуруҳи таркибидаги махсус бўлинма) тегишли бошқа юқори мартабали етакчилари ҳам ҳалок бўлган. Ҳужум маҳаллий вақт билан соат 16:00 атрофида содир бўлган.
Бу жорий йил бошидан бери Исроилнинг Ливан пойтахтига учинчи марта зарба беришидир. Январь ойида ҲАМАС сиёсий бюроси раҳбари ўринбосари Солиҳ ал-Аурий Исроилнинг Байрутга берган ҳаво ҳужуми оқибатида ҳалок бўлган эди. Июль ойида “Ҳизбуллоҳ” ҳарбий қўмондони Фуад Шукр навбатдаги зарба қурбони бўлган эди.
17 сентябрь куни бутун Ливан бўйлаб минглаб пейжерлар портлагани, 18 сентябрь куни эса бошқа алоқа қурилмалари портлагани ҳақида хабар берилган эди. Ҳодисалар оқибатида 37 киши ҳалок бўлган, 2600 дан ортиқ киши жароҳатланган.
Иброҳим Оқил аслида ким?
Оқил “Ҳизбуллоҳ”нинг ҳарбий амалиётларини бошқарган. У 1983 йилда Байрутдаги АҚШ элчихонасига (63 киши ҳалок бўлган) ва Байрутдаги америкалик ҳамда француз аскарларининг казармаларига (307 киши ҳалок бўлган) уюштирилган ҳужумларда иштирок этгани билан танилган.
2019 йилда Қўшма Штатлар Оқилни террорчилар рўйхатига киритган, 2023 йилда эса Америка Давлат департаменти унинг қаерда эканлиги ҳақидаги маълумот учун 7 миллион доллар тўлашини маълум қилган.
Изоҳ (0)