Ўзбекистонда шакар нархи ошмоқда. Давлат статистика қўмитаси маълумотларига кўра, ҳозир бир килограмм шакарнинг ўртача нархи 9 500-13 000 сўмни атрофида. Айрим нуқталарда шакар 14 минг сўм туради.
Иқтисодий тараққиёт ва камбағалликни қисқартириш вазирлиги асосий сабаб ташқи омиллар, яъни, қўшни мамлакатлардаги вазият бўлганини маълум қилди.
Қўшни давлатларда вазият қандай?
Қирғизистонда май ойида шакар 10 фоизга қимматлашди ва ҳозирда 14 800 сўм атрофида туради. Бу фонда мамлакатда шакар экспортига вақтинчалик тақиқ жорий этилди. Бу шакар бошқа мамлакатларга оммавий экспорт қилинмаслиги учун қилинган.
Қозоғистонда май ойида шакар 8,7 фоизга қимматлашди ва ҳозирда бир килограмми 15 400 сўм атрофида туради. Мамлакат расмийлари шакар тақчиллиги йўқлигини маълум қилди – захиралар 3 ойга этади ва улар доимий равишда тўлдирилмоқда.
Тожикистонда май ойида шакар 8 фоизга қимматлашди ва ҳозир бир килограмми ўртача 12 600 сўм атрофида туради. Бу фонда расмийлар захиралар ҳисобига арзонроқ шакар сотишни бошладилар.
Россияда май ойида шакар 3 фоизга қимматлашди ва энди 13 минг сўм атрофида туради. Мамлакат март ойида шакар экспортини чеклаган.
Арманистонда шакар 1,3 фоизга қимматлашди ва ҳозирда 12 500 сўм атрофида туради. Мамлакат расмийлари ғалла экспортини чеклаб қўйган, аммо бу ҳали шакарга тааллуқли эмас.
Беларусда шакар 0,2 фоизга қимматлашди ва энди 10 400 сўм атрофида туради. Мамлакатда шакар ишлаб чиқарувчи тўртта корхона фаолият юритиб, бозор барқарорлигини таъминламоқда.
Ўзбекистон нархлар ошишининг олдини олиш учун нима қиляпти?
Иқтисодий тараққиёт ва камбағалликни қисқартириш вазирлиги маълумотларига кўра, Ўзбекистонда шакар тақчиллиги кузатилмаяпти ва йил охиригача ички бозорни шакар билан тўлдириш учун барча захиралар мавжуд.
Шакарга бўлган талабнинг мавсумий ўсиши (мева-сабзавотларни сақлаш мавсуми) шароитида нархлар барқарорлигини таъминлаш мақсадида жорий йилнинг июнь ойидан биржадаги шакар ҳажми 50 фоизга, яъни 2 минг тоннадан 3 минг тоннагача оширилади.
Бу йил шакар ишлаб чиқариш 720 минг тоннани ташкил этади, бу ўтган йилга нисбатан 22 фоизга кўпдир. Шу билан бирга, шакар ва унинг учун хом ашё импорти ҳажми ўтган йилги 643 минг тоннадан 900 минг тоннага ошади.
Натижада йил якунига қадар ишлаб чиқарилган ва импорт қилинадиган тайёр шакар қолдиғи 118 минг тоннадан ошади.
Изоҳ (0)