Шавкат Мирзиёев ва Эмомали Раҳмон Абадий дўстликни мустаҳкамлаш ва иттифоқчилик тўғрисидаги декларацияни имзолади
Ўзбекистон ва Тожикистон ўртасида 2 июнь куни ўтказилган олий даражадаги музокаралар якунида ҳужжатларни имзолаш ва алмашиш маросими бўлди. Бу ҳақда Президент матбуот хизмати хабар қилди.
Қайд этилишича, Шавкат Мирзиёев ва Эмомали Раҳмон тарихий аҳамиятга эга Абадий дўстликни мустаҳкамлаш ва иттифоқчилик тўғрисидаги декларацияни имзолаган. Бундан ташқари, ҳукуматлар, вазирлик ва идоралар даражасида кўп қиррали Ўзбекистон—Тожикистон ҳамкорлигини кенгайтиришга қаратилган 11 та ҳужжат имзоланган.
- саноат кооперацияси соҳасидаги ҳамкорликни янада мустаҳкамлаш ва кенгайтириш бўйича «йўл харитаси»;
- маданият вазирликлари ўртасида 2022—2023 йилларга мўлжалланган маданият ва санъат соҳаларидаги ҳамкорлик тўғрисида битим;
- Ўзбекистоннинг Жиззах вилояти ва Тожикистоннинг Сўғд вилояти ўртасидаги икки томонлама ҳамкорликни ривожлантириш бўйича «йўл харитаси»;
- атроф-муҳитни муҳофаза қилиш ва сувдан оқилона фойдаланиш соҳаларида ҳамкорлик тўғрисида меморандум;
- ипакчилик тармоғида ҳамкорлик тўғрисида меморандум.
31 май куни Шавкат Мирзиёевнинг таклифига биноан Тожикистон президенти Эмомали Раҳмон жорий йил 2—3 июнь кунлари расмий ташриф билан Ўзбекистонда бўлиши ҳақида хабар берилди.
Эмомали Раҳмон 2 июнь куни эрталаб Тошкентга етиб келди. У йўловчи рейсларини бажарувчи самолётдан фойдаланган. «Спутник Тожикистон»нинг қайд этишича, Тожикистон раҳбари бюджет пулларини иқтисод қилиш учун шахсий самолёт сотиб олишни истамаган.
Тошкент халқаро аэропортида уни президент Шавкат Мирзиёев кутиб олган. Етакчилар ўртасида қисқа суҳбат бўлиб ўтган. Сўнг Кўксаройда Эмомали Раҳмонни расмий кутиб олиш маросими бўлиб ўтган. Маросимда икки мамлакат расмий делегациялари аъзолари ҳам иштирок этган.
Бундан ташқари, давлат раҳбарлари ўртасида тор доирада учрашув бўлиб ўтди. Музокаларда Марказий Осиёда тинчлик ва барқарорликни таъминлаш масалалари муҳокама қилинди. Музокаралар икки мамлакат делегациялари иштирокида кенгайтирилган таркибда давом этди. Президентлар фан, таълим, санъат, кино ва туризм соҳаларидаги ҳамкорликка эътибор қаратиш зарурлигини таъкидлади.
Шундан сўнг Зарафшон дарёсида Яван гидроэлектр станцияси қурилишини бошлаш маросими бўлиб ўтди. Шавкат Мирзиёев ва Эмомали Раҳмон рамзий тугмани босиб, қурилишга старт берди.
