Олий Мажлиси Сенатининг йигирма олтинчи ялпи мажлиси 28 май куни соат 10:00 да иш бошлайди. Бу ҳақда юқори палата матбуот хизмати хабар қилди.
Қайд этилишича, йиғилиш Тошкент шаҳрида Сенатнинг мажлислар залида бўлиб ўтади. Эътиборлиси, ялпи мажлис видеоконференцалоқа тарзида ўтказилиши режалаштирилган — Сенатнинг YouTube тармоғидаги саҳифаси орқали тўғридан-тўғри ёритиб борилади.
Сенат мажлисларининг жонли эфири масаласи
Палата ялпи мажлислари 2019 йилда Сенатга Танзила Норбоева раис этиб сайлангач, жонли эфирга узатилишини йўлга қўйган ва 28 апрелгача ўтказилган барча ялпи мажлислар тўғридан-тўғри эфирга узатиб келинаётганди.
Шу кунги мажлис Сенатнинг ижтимоий тармоқларидаги саҳифаларида эфирга узатилмади. UzReport телеканали орқали намойиш этилган тўғридан-тўғри эфири 18 дақиқагина давом этди. Тўғридан-тўғри эфирнинг деярли 10 дақиқасида журналист Мақсуда Абдуқаюмова кун тартибида кўриб чиқиладиган қонунлар тўғрисида гапирди. 11-дақиқада мадҳия янграганидан сўнг, Танзила Норбоева президент Шавкат Мирзиёевнинг Қашқадарё вилоятига ташрифи, 2022—2026 йилларда Қорақалпоғистонни ривожлантиришнинг беш йиллик дастури ҳақида, Самарқанд ва Жиззах вилоятларида содир бўлган сув тошқинлари ҳақида сўзлади. Норбоева сенаторлардан у ёки бу масалалар бўйича фикр-мулоҳазаларини сўради, шундан сўнг эфир узилиб қолди.
Президентнинг 2021 йил июнда қабул қилинган «Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида»ги фармонида Ўзбекистон Миллий телерадиокомпанияси 1 декабрдан Олий Мажлис Қонунчилик палатаси ва Сенати мажлислари, Қорақалпоғистон Республикаси Жўқорғи Кенгеси, халқ депутатлари вилоят, туман, шаҳар кенгаши сессиялари (ёпиқ мажлислар бундан мустасно) телеканаллар, шунингдек, Интернет тармоғи орқали жонли эфирга узатилишини таъминлаши белгиланганди.
Изоҳ (0)