Расман: Килиан Мбаппе «ПСЖ»да қолади

Ҳужумчи Килиан Мбаппе «ПСЖ»да қолади. Бу ҳақда Париж клуби расмий сайтида хабар берилди.

Париж клуби ҳужумчи билан 2025 йилгача мўлжалланган янги шартнома имзолаганини маълум қилди. Мбаппенинг парижликлар билан амалдаги шартномаси шу йилнинг 30 июнига қадар мўлжалланганди.

Қайд этиш керак, бунгача бир неча бор Мбаппенинг «Реал» билан келишувга эришгани ва ёзда унинг эркин агент сифатида мадридликлар сафига ўтиши мумкинлиги ҳақида хабарлар янграганди.

Мбаппенинг «Реал»га рад жавобини беришида нафақат молиявий манфаатлар, балки унинг оила аъзолари ва ҳужумчининг «Монако»дан «ПСЖ»га ўтишида иштирок этган нуфузли шахсларнинг ҳам ўрни борлиги айтилмоқда.

«ПСЖ» Килианга келишувни узайтиргани учун 300 млн евро бонус ва йилига 100 млн евро маош (солиқлардан кейин) таклиф қилаётгани ҳақида хабарлар тарқалганди. Футболчининг онаси қуйидагича баёнот берган: «Реал» ва «ПСЖ» билан келишувимиз бор, таклифлар тенг. Фақат Килиан улардан бирини танлаши керак».

Маълумот учун, Мбаппе 2018 йилдан буён «ПСЖ»да ўйнаб келмоқда. Парижликлар унинг трансферига «Монако»дан 180 миллион евро тўлаган.