Килиан Мбаппе «ПСЖ»да қолади ва «Реал»нинг таклифини рад этади.
Бу ҳақда жаҳон футболининг энг ишончли инсайдерларидан бири Фабрицио Романо хабар берди. Романога кўра, Мбаппе Парижда қолади ва бу ёзда «Реал»га ўтмайди. Футболчи якуний қарорини «Реал» президенти Флорентино Пересга маълум қилган.
Шунингдек, Sky Sport журналисти Жанлука ди Марцио ҳам 23 ёшли франциялик ҳужумчининг парижликлар билан шартномасини узайтиришга қарор қилгани ҳақида маълумот тарқатди.
Ягона етишмаётган нарса — расмий маълумот, 21 май куни Лига 1 нинг 38-тури доирасидаги «Мец»га қарши ўйиндан сўнг эълон қилиниши мумкин.
Мбаппенинг узоқ вақт илгари оғзаки келишувга эришган «Реал»га рад жавобини беришида нафақат молиявий манфаатлар, балки унинг оила аъзолари ва ҳужумчининг «Монако»дан «ПСЖ»га ўтишида иштирок этган нуфузли шахсларнинг ҳам ўрни борлиги айтилмоқда.
RMC Sport ҳам Мбаппе жамоасини ўзгартирмасликка қарор қилганини тасдиқламоқда. Парижликлар билан янги шартнома бўйича музокаралар яхши кетаётгани айтилди.
Мбаппенинг парижликлар билан шартномаси 2021/22 йилги мавсум охиригача мўлжалланган.
Ҳозирча футболчи ҳам, «ПСЖ» ҳам трансфер борасида расмий маълумот бергани йўқ. 20 май куни Флоретино Перес «Реал» футболчиларига Мбаппе билан шартнома имзоланмаслигини айтгани, «ПСЖ» Килианга келишувни узайтиргани учун 300 млн евро бонус ва йилига 100 млн евро маош (солиқлардан кейин) таклиф қилаётгани ҳақида хабарлар тарқалганди. Футболчининг онаси эса қуйидагича баёнот берганди: «Реал» ва «ПСЖ» билан келишувимиз бор, таклифлар тенг. Фақат Килиан улардан бирини танлаши керак». Унгача футболчи ўз қарорини 22 май куни тушдан кейин ТФ1 канали эфирида эълон қилиши айтилганди.
Изоҳ (0)