Hujumchi Kilian Mbappe “PSJ”da qoladi. Bu haqda Parij klubi rasmiy saytida xabar berildi.
Parij klubi hujumchi bilan 2025-yilgacha mo‘ljallangan yangi shartnoma imzolaganini ma’lum qildi. Mbappening parijliklar bilan amaldagi shartnomasi shu yilning 30-iyuniga qadar mo‘ljallangandi.
Qayd etish kerak, bungacha bir necha bor Mbappening “Real” bilan kelishuvga erishgani va yozda uning erkin agent sifatida madridliklar safiga o‘tishi mumkinligi haqida xabarlar yangragandi.
Mbappening “Real”ga rad javobini berishida nafaqat moliyaviy manfaatlar, balki uning oila a’zolari va hujumchining “Monako”dan “PSJ”ga o‘tishida ishtirok etgan nufuzli shaxslarning ham o‘rni borligi aytilmoqda.
“PSJ” Kilianga kelishuvni uzaytirgani uchun 300 mln yevro bonus va yiliga 100 mln yevro maosh (soliqlardan keyin) taklif qilayotgani haqida xabarlar tarqalgandi. Futbolchining onasi quyidagicha bayonot bergan: “Real” va “PSJ” bilan kelishuvimiz bor, takliflar teng. Faqat Kilian ulardan birini tanlashi kerak”.
Ma’lumot uchun, Mbappe 2018-yildan buyon “PSJ”da o‘ynab kelmoqda. Parijliklar uning transferiga “Monako”dan 180 million yevro to‘lagan.
Izoh (0)