Davlat aktivlarini boshqarish agentligi (DABA) huzuridagi UzAssets investitsiya kompaniyasi “Farg‘ona neftni qayta ishlash zavodi” ustav fondidagi UzAssets’ning 100 foiz ulushini 100 mln dollarga sotish to‘g‘risida kelishuvga erishdi.
Zavodni neft va gaz sohasidagi xususiy korxona — “Sanoat energetika guruhi” sotib oladi.
Xususiylashtirish ochiq savdo jarayoni orqali amalga oshirilgani aytilmoqda. Bu bo‘yicha konsultant sifatida KPMG Valuation and Consulting xalqaro konsalting kompaniyasi jalb qilingan.
Davlat ulushini baholash uchun esa Big4 (“Katta to‘rtlik”)ga kirgan xalqaro baholash kompaniyasi jalb qilingan. Dentons xalqaro yuridik firmasi tomonidan UzAssets’ga qo‘shimcha huquqiy ko‘mak ko‘rsatilgan.
Sotish jarayoni boshlangani haqidagi xabar 2021-yil 30-aprel kuni e’lon qilingan edi.
Korxona mamlakatdagi dastlabki ishlab chiqarish quvvati 6,5 mln tonnani tashkil etadigan eng yirik neftni qayta ishlash zavodlaridan biri bo‘lib, uning tarixi 1959-yilga borib taqaladi. 1907-yilda ishga tushirilgan Oltiariq yoqilg‘i ishlab chiqarish quvvati shular jumlasidandir.
O‘tgan asrning 60-yillarida “Farg‘ona neftni qayta ishlash zavodi” G‘arbiy Sibir konlaridan xomashyo bilan ta’minlangan.
Bundan tashqari, zavod butun sobiq Sovet xomashyosini qayta ishlash tizimining bir qismi bo‘lgan. O‘tgan 20 yil davomida zavodda modernizatsiya va rekonstruksiya ishlari amalga oshirilmagan.
Zavodning to‘liq ishlashi uchun asosiy qiyinchiliklardan biri bu O‘zbekiston hududida xom ashyoning yetishmasligidir. Pandemiya korxonaning moliyaviy faoliyatiga ham salbiy ta’sir ko‘rsatib, neft ta’minotining yetishmasligini oshirdi hamda neft mahsulotlariga talabni kamaytirdi.
So‘nggi 10 yil ichida yiliga o‘rtacha 1-1,5 mln tonna neft qayta ishlangan bo‘lsa, 2020-yilda atigi 900 ming tonna xomashyo qayta ishlangan, xolos.
Bitim doirasida “Sanoat energetika guruhi” quyidagi majburiyatlarni bajarishni o‘z zimmasiga oladi:
- Zamonaviy va ekologik toza benzin;
- Yevro-5 talablariga javob beradigan dizel yonilg‘isi;
- Jet a-1 reaktiv yonilg‘isi;
- Suyultirilgan tabiiy gaz ishlab chiqarishni ko‘paytirish;
- Neft agregatlarini modernizatsiya qilish;
- Ishlab chiqarish quvvatini kamida 2 million tonnaga oshirish;
- 380 mln dollardan ortiq investitsiya majburiyatlarini bajarish.
- 2 yil mobaynida korxonada mavjud ish o‘rinlarini va ishchilar sonini saqlab qolish;
- Xodimlarning ish haqlarini bitim imzolash sanasidagi miqdordan kamaytirmaslik;
- Jamoa shartnomasining asosiy shartlari saqlanishini ta’minlash;
- Boshqa ijtimoiy majburiyatlarni maksimal darajada saqlash.
“Sanoat energetika guruhi” O‘zbekistondagi eng yirik xususiy vertikal integratsiyalashgan neft va gaz kompaniyalaridan biri hisoblanadi.
Ayni paytda kompaniya yer qa’ridan foydalanish huquqiga ega bo‘lgan 103 ta konga egalik qiladi va neft qazib olishning taxminan 80 foizini va tasdiqlangan gaz zaxiralarining taxminan 22 foizini tashkil qiladi.
Neft va gaz qazib olishdan tashqari, kompaniya benzin, dizel, neft, aviatsiya kerosini va boshqa bir qator yuqori qo‘shilgan qiymatga ega mahsulotlar ishlab chiqaradi.
Korxona O‘zbekistondagi strategik loyihalarda, jumladan, neft qazib olishni ko‘paytirish loyihalarida ishtirok etadi.
Avvalroq Xalqaro moliya korporatsiyasi “Farg‘onaazot”ni xususiylashtirishga yordam berishi haqida xabar berilgan edi.
Izoh (0)