Давлат статистика қўмитаси маълумотига кўра, жорий йилнинг январь—апрель ойлари якуни бўйича ташқи савдо ҳажми 17,1 млрд долларни ташкил этган. Бу 2021 йилга нисбатан 6,5 млрд долларга ёки 61,2 фоизга кўпроқ. Шундан 7 млрд доллари экспортга, 10 млрд доллари импортга тўғри келади.
Ўзбекистон ким билан кўпроқ савдо ишларини олиб борган
Сўнгги ойларда Хитой Ўзбекистоннинг савдодаги асосий ҳамкорига айланди. Бу давлат билан товар айирбошлаш ҳажми 3,1 млрд долларга етган.
Россия 2,5 млрд доллар билан иккинчи ўрин бўлди, Қозоғистон 1,4 млрд доллар билан учинчи ўринни эгаллади.
Туркия тўртинчи (1,1 млрд доллар), Жанубий Корея эса бешинчи ўринда ( 912 млн доллар) қайд этилган.
Шунингдек, Германия, Қирғизистон, Туркманистон, Афғонистон ва Ҳиндистон ҳам кучли ўнликдан жой олган.
Ўзбекистон бу мамлакатларнинг аксарияти билан савдо муносабатларида сотишдан кўра, кўпроқ сотиб олади. Айниқса, Жанубий Корея билан орадаги фарқ кучли — экспорт атиги 16,2 млн долларни, импорт эса 895 млн долларни ташкил этган.
Ўзбекистон кимга нима сотди
Биринчи ўринда олтин (улуши 42 фоиз). Иккинчи ўринда саноат товарлари (21,6 фоиз), учинчи ўринда хизматлар (11,8 фоиз).
Миқдорлар ҳақида гапирадиган бўлсак, олтин 2,9 млрд долларга, саноат товарлари 1,5 млрд долларга, хизматлар эса 836 млн долларга сотилган.
11,7 фоиз улуш билан Хитой асосий харидор бўлган. Иккинчи ўринда Россия (9,9 фоиз), учинчи ўринда Туркия (8,1 фоиз).
Тошкент шаҳри, Тошкент ва Андижон вилоятлари хорижга энг кўп маҳсулот сотган. Энг кам сотганлар — Сурхондарё, Хоразм ва Жиззах вилоятлари.
Ўзбекистон кимдан нима сотиб олди
Биринчи ўринда аввалги йиллардаги каби саноатни ривожлантириш учун машина ва транспорт-асбоб ускуналари (3,5 млрд доллар).
Иккинчи ўринда саноат маҳсулотлари (1,8 млрд доллар), учинчи ўринда кимёвий воситалар ва шунга ўхшаш маҳсулотлар (1,4 млрд доллар).
Ўзбекистон энг кўпи Хитой (22,7 фоиз), Россия (18,5 фоиз) ва Қозоғистондан (10,3 фоиз) харид қилган.
Ҳудудлар бўйича энг кўп импорт қилинган маҳсулотлар Тошкент шаҳри, Тошкент ва Андижон вилоятларига тўғри келади. Энг ками — Қашқадарё вилояти, Қорақалпоғистон Республикаси ҳамда Сурхондарё вилоятига.
Эътиборга молик жиҳатлар
Ўзбекистон сотишдан кўра, кўпроқ сотиб олишда давом этмоқда. Бу иқтисодиётни жадал ривожлантириш учун ресурслар ва воситалар сотиб олинаётгани билан изоҳланади.
Шу мақсадда мамлакат бир неча йиллардан бери саноат учун зарур бўлган машина ва ускуналарга энг кўп маблағ сарфлади. Бунинг эвазига, масалан, олтин юборилмоқда.
Изоҳ (0)