Ўзбекистонда ногиронлиги бўлган 790 минг нафар фуқаронинг атиги 5,9 фоизи иш билан банд қилинган. Бу ҳақда Бандлик ва меҳнат муносабатлари вазирлигида бўлиб ўтган матбуот анжуманида хабар берилди, дея хабар берди «Дарё» мухбири.
Бандлик ва меҳнат муносабатлари вазирининг биринчи ўринбосари Эркин Муҳитдиновнинг маълумот беришича, бугунги кунда, Ўзбекистонда 790 минг нафардан ортиқ ногиронлиги бўлган шахслар расман рўйхатга олинган бўлиб, уларнинг 62 фоизга яқини қишлоқ жойларда истиқомат қилади.
«Ногиронлиги бўлган шахсларнинг 123,9 минг нафари 16 ёшгача бўлган болалар бўлса, 666,3 минг нафардан ортиғи 16 ёшдан катталар ҳамда 201,7 мингдан ортиғи пенсия ёшидаги кишиларни ташкил қилади. Ногиронлиги бор фуқароларнинг 248,2 минг нафардан зиёди меҳнат фаолиятига лаёқатли бўлиб, шундан 46,7 минг нафари ёки бор-йўғи 18,8 фоизи банд қилинган. Бу жами ногиронлиги бўлган шахсларнинг атиги 5,9 фоизи ишли эканини билдиради», — дейди Эркин Муҳитдинов.
Вазир ўринбосарига кўра, ногиронлиги бўлган шахсларни давлат ташкилотлари ва хусусий секторнинг потенциал ходимлари эмас, балки асосан хайрия ва реабилитация ёрдамини олувчилар сифатида қараш сақланиб қолмоқда.
«Жамиятимиздаги нотўғри қарашлар иш берувчилар томонидан ногиронлиги бўлган шахсларнинг меҳнат кўникмалари, қобилиятлари ва истеъдодларига ишонч йўқлиги, шунингдек, очиқ меҳнат бозорида кўп учрайдиган ногиронлик белгиси бўйича камситиш ҳали ҳам бор. Бунга аксарият, иш берувчиларда ногиронлиги бўлган шахсларни ишга қабул қилиш ва уларга шарт-шароит яратиш ҳамда ижтимоий ҳимоя қилиш борасида корпоратив маданият етарли даражада эмаслиги сабаб бўлмоқда. Шу пайтга қадар ногиронлиги бўлган шахсларни ишга қабул қилган иш берувчиларни моддий қўллаб-қувватлашнинг самарали механизмлари йўлга қўйилмаган. Шунингдек, ногиронлиги бўлган шахсларни касб-ҳунарга ўқитиш тизими етарли даражада йўлга қўйилмаган», — дейди вазир ўринбосари.
Матбуот анжуманида қайд этилишича, Ўзбекистон Республикасининг 2020 йил 20 октябрдаги «Аҳоли бандлиги тўғрисида»ги қонунида иш ўринларининг энг кам сонини белгилаш ва иш ўринларини захирага қўйиш тартиби белгиланган.
«Ушбу йўналишни таҳлил қилдик, жумладан, корхона ва ташкилотларда ишлаётган ходимлар тоифаси таҳлил қилинганда, штат бирлиги 20 тадан ортиқ бўлган 2 миллион 615 минг нафар ходимлар ишловчи 17 030 та корхона ва ташкилотларда 36,1 минг нафар ногиронлиги бўлган шахслар ишлаётганлиги маълум бўлди. Қонун талабига асосан, ушбу корхоналарда жами штат сонининг 3 фоизида яъни 78 470 та иш ўринларида ногиронлиги бўлган шахслар ишлаши лозим бўлса, бизда яна қўшимча равишда 42 мингдан ортиқ ногиронлиги бўлган шахсларни ишга жойлаштириш имкониятларимиз борлиги маълум бўлмоқда», — дейди масъул.
Изоҳ (0)