Бельгияда маймунчечак билан касалланишнинг дастлабки ҳолатлари аниқланди, деб хабар бермоқда La Libre Belgique газетаси.
Нашр маълумотларига кўра, Бельгияда ушбу касаллик икки кишида қайд этилган.
Маймунчечак билан касалланиш ҳолатлари аллақачон Италия, Швеция, Испания, Буюк Британия, Португалия, АҚШ, Канада ва Австралияда қайд этилган. Шунингдек, 20 май куни Францияда касалликнинг биринчи ҳолати ҳақида эълон қилинди.
Газета Бельгия тиббиёт маъмуриятининг расмий вакили, юқумли касалликлар бўйича мутахассис Ив Ван Летемга касалликнинг белгилари ҳақида савол билан мурожаат қилди.
Мутахассиснинг сўзларига кўра, маймунчечакнинг белгилари йўтал, иситма, бош оғриғи, танадаги оғриқлар, лимфа тугунларининг шишиши бўлиб, одамлар буни грипп ёки COVID-19 деб ўйлаши мумкин. Маймунчечакнинг улардан фарқи шундаки, бутун танага йирик пуфакчалар тошиши мумкин, улар аста-секин ҳуснбузарларга айланади. Бу кўпроқ сувчечакни эслатади.
Мутахассиснинг фикрича, вируснинг инкубация даври одатда 7—14 кунни ташкил қилади. Баъзи ҳолларда, у 21 кунгача чўзилиши мумкин.
Европада аниқланган касалликнинг биринчи ҳолатлари шифокорларга инфекция ҳаво томчилари орқали юқади, деган тахминни бермоқда. Касаллик ҳайвонлар ва одамлар орасида ҳам юқади.
Маймунчечакнинг аниқ сабаби ҳалигача номаълум. Ҳозирда унга қарши ҳеч қандай муолажа йўқ, аммо аломатлар кўпинча 14—21 кун ичида ўз-ўзидан йўқолади.
«Ушбу касаллик одамларда кам учрайди ва ўта юқумли эмас», — дейилди La Libre Belgique хабарида.
Изоҳ (0)