Бугун, 17 май куни Тошкентдаги Lumiere меҳмонхонасида «Тожикистон, Қирғизистон ва Қозоғистон Республикасида экспорт-импорт операцияларини амалга оширишнинг ўзига хос хусусиятлари» деб номланган семинар бошланди.
Тадбир Ready4Trade — Central Asia лойиҳаси доирасида амалга оширилмоқда. Мазкур лойиҳа трансчегаравий талабларнинг шаффофлигини ошириш, регулятив ва процессуал тўсиқларни бартараф этиш, трансчегаравий электрон тижоратни такомиллаштириш, халқаро савдони кучайтириш орқали Марказий Осиёнинг бешта давлатида минтақалараро ва халқаро савдони ривожлантиришга қаратилган. Шунингдек, аёллар бошчилигидаги корхоналарнинг халқаро савдода иштирок этиш имкониятларини кенгайтириш ҳам асосий мақсадлардан бири ҳисобланади.
Ready4Trade — Central Asia лойиҳаси Европа Иттифоқи томонидан молиялаштирилади ва Халқаро савдо маркази (ITC) томонидан миллий ҳамкорлар билан биргаликда амалга оширилади.
Семинарда Ўзбекистон давлат божхона қўмитаси, Ўзбекистон Инвестициялар ва ташқи савдо вазирлиги, Қирғизистон, Тожикистон, Қозоғистон ва Ўзбекистон Божхона брокерлари ассоциациялари раислари, хусусий сектор вакиллари иштирок этмоқда.
Семинарнинг 1-кунида сўзга чиққан Қирғизистон Божхона брокерлари ассоциацияси раиси Иван Гелетюк Евросиё Иқтисодий Иттифоқида божхона қонунчилиги ва божхона ишини тартибга солиш мавзусида сўз юритди. Маълумки, Қирғизистон ва Қозоғистон мазкур Иттифоқ аъзолари ҳисобланишади.
Гелетюк Евросиё Иқтисодий Иттифоқи томонидан қабул қилинган божхона бўйича умумий қоидалар ҳақида тушунтириш берди. Мавзу юзасидан йўлланган саволларга жавоб бериб ўтди.
Тадбир якуни бўйича иштирокчилар Божхона қонунчилиги ва қўшни давлатларнинг ташқи иқтисодий фаолиятини тартибга солувчи қонун ҳужжатлари соҳасидаги билимларини кенгайтириш, ташқи савдо битимларини тузиш соҳасида малака ошириш, Марказий Осиё минтақасида трансчегаравий савдоларни амалга оширишнинг ҳуқуқий асосларини ўрганиб олиш имкониятига эга бўлишади.
Семинар 19 майга қадар давом этади.
Изоҳ (0)