Ўзгаришга бўлган эҳтиёж Ўзбекистон Конституциясида яққол кўриниб турибди. Бу ҳақда 17 май куни «Миллий тикланиш» демократик партияси раиси Алишер Қодиров айтиб ўтди, деб хабар бермоқда «Дарё» мухбири.
Бугун Олий Мажлис Қонунчилик палатасида бўлиб ўтган Ўзбекистон Либерал-демократик партияси ҳамда Ўзбекистон «Миллий тикланиш» демократик партияси фракцияларининг қўшма йиғилишида Конституцияга ўзгартириш ва қўшимчалар киритиш борасидаги қарор лойиҳаси депутатлар томонидан маъқулланган эди.
Алишер Қодировнинг таъкидлашича, бугунги қилинган иш — ташаббус.
Ташаббуснинг зарурати нимадан келиб чиққанлигини биз баён қилдик. Бу зарурат Ўзбекистоннинг ривожланишининг айни шу босқичидаги зарурат. Ўзгаришга бўлган эҳтиёж Конституциямизда яққол кўриниб турибди. Буни бутун жамоатчилик эътироф этяпти. Ўзбекистоннинг бугунги ривожланиш босқичи янги конститусияни тақозо қилмоқда. Бу ташаббус даражасидаги масала. «Миллий тикланиш» ҳамда ЎзЛиДеП фракцияси бу ташаббусни қўллаб-қувватлаб, қўшма мажлисда навбатдаги белгиланган тартибдаги чораларини кўриш ташаббусини илгари суришди. Бу қанақа? Олий Мажлис палаталарининг кенгашларига биз мана шу конституцион ислоҳотларни ташкил қилиш вазифасини кўтардик.Энди навбатдаги вазифа — Олий Мажлис палаталари кенгашлари тегишли комиссияни йиғган ҳолда бу жараёнга старт беришади. Ҳозир аниқ бир лойиҳа, «мана буни кўриб чиқамиз» деган масала йўқ. У ерда бутун жамоатчилик, биз ҳам партия сифатида ўз таклифларимизни беришимиз мумкин. Барча таклифлар жамланган ҳолатда бу комиссия ўзининг фаолиятини ташкил қилади. Конституциянинг қайси моддасида, нималарни ўзгартиришимиз керак, қандай ўзгаришларга эҳтиёж бор, деган саволларни комиссия таҳлил қилади ва жамоатчиликка очиқ равишда ўз фаолиятини ташкил қилади. Ва бу фаолият ҳеч кимдан яширинган, қайсидир масалаларни ўзича ҳал қиладиган жараён бўлмайди. Бу кенг ва очиқ жараён бўлади. Ҳозирги жараёнда биз ташаббусларни кўтардик, энди палаталарнинг кенгашлари тегишли тартибда ўзининг ваколатидан келиб чиқиб ишчи гуруҳ ёки комиссия ташкил қилади. Бу гуруҳда мутахассислар жалб қилинган ҳолатда келиб тушган таклифлар асосида ишини ташкил қилади.
«Миллий тикланиш» демократик партияси раиси Алишер Қодиров
Эслатиб ўтамиз, 16 май куни Олий Мажлис Қонунчилик палатасида ўтказилган йиғилишда Ўзбекистон Либерал-демократик партияси Конституцияга ўзгартириш ва қўшимчалар киритиш жараёнини бошлаш таклифи билан чиққан эди.
Шавкат Мирзиёев 8 декабрь — Конституция байрами муносабати билан Ўзбекистон халқига йўллаган табригида мамлакат асосий қомусига ўзгартиришлар киритилиши мумкинлиги ҳақида гапирганди.
Изоҳ (0)