Футбол – йилдан йилга ўзгараётган, такомиллашиб бораётган, миллионлар эмас, балки миллиардлар ўйинига айланаётган спорт тури. Интернет нашрлар ривожланиб, янгиликлар турли тармоқларда узатилишидан аввал барча соҳаларга қатори футболга оид янгиликлар ҳам инсонларга телевидение, радио ва газета-журналлар орқали етказиб берилган.
Хўш, 11 йил аввал ўзбек футбол газеталари нималар ҳақида ёзган, мулоҳазалар қилган, кимлар билан интервьюлар уюштирган? Буларнинг барчаси «Ўзбек футболи газеталари тарихи» рукнида эълон қилиб борилади.
Ўз даврининг энг суюкли нашри бўлган «Интерфутбол» газетасининг 2011 йил 17 май санасида чиққан сонида Усмон Тошевнинг «Насаф» менежери бўлгани ҳақида хабар берилган. Таъкидланишича, Тошев ушбу лавозимда «Бунёдкор»га ўтиб кетган Баҳром Давлетовнинг ўрнини эгаллаган. Хабарда, шунингдек, Усмон Тошевнинг 2008 йили ҳам «Насаф»да ишлагани айтилган.
Маълумот учун, 2021 йилнинг октябрь ойида Усмон Тошев ЎФА терма жамоалар бўлими бошлиғи этиб тайинланган эди ва ҳозирда шу лавозимда ишлаб келмоқда.
Ўзбекистон чемпионати тақвимидаги ўзгаришлар ўша вақтларда ҳам тез-тез бўлиб турган. Терма жамоанинг ўртоқлик учрашувларида «Пахтакор» ҳамда «Бунёдкор» футболчилари иштирок этиши сабаб Ўзбекистон чемпионатининг 10-туридан ўрин олган ушбу икки жамоа ўртасидаги баҳс 29 майга қолдирилган.
Шунингдек, «Бунёдкор»нинг ОЧЛ 1/8 финал ўйини сафарда «Сепаҳон»га қарши ўтиши муносабати билан жамоанинг 9-турдан ўрин олган «Олмалиқ»қа қарши ўйини бир кун олдинга сурилиб, 19 майга белгиланган.
«Қизларга хорижлик мураббий керак» сарлавҳаси остидаги хабарда гап Ўзбекистон 20 ёшгача бўлган қизларидан тузилган терма жамоага хорижий мамлакатдан мураббий олиб келиш бўйича музокаралар олиб борилаётгани айтилган. Ушбу масала юзасидан собиқ ЎФФ президенти Мираброр Усмонов топшириқ берган.
Ушбу хабарда яна бир эътиборга лойиқ ҳолат бор: ЎФФга ФИФА вакилларининг келиши кутилаётгани ва унда ёллар ўртасида U-20 Жаҳон чемпионатини Ўзбекистонда ўтказиш масаласи муҳокама қилиниши айтилган. Ўшанда ФИФА Ўзбекистонга мундиал мезбонлигини берган, бироқ кейинчалик ташкилотнинг ўзи Ўзбекистонни бу ҳуқуқдан маҳрум қилганди.
Айнан 2011 йили Россиянинг «Анжи» сафига бориб қўшилган Одил Аҳмедов рус нашрларидан бирига берган интервьюсида бразилиялик Ривалдо ва Роберто Карлос ҳақида шундай деган: «Ривалдо катта иқтидор соҳиби. Унинг ҳужумни якунлаш пайтидаги ҳаракатлари, ақлли ва аниқ тўп узатишлари ва бошқа бир қанча жиҳатларини кўриб-кузатиб, ўзимга анча фойдали томонларни ўзлаштирдим. У ва бошқа машҳур футболчилар ўзбек футболига катта наф берди. Роберто ҳам ҳозир Россия лигасига фойда келтирмоқда. Унинг ёнида тўп суриш жуда осон. Тажрибаси улкан, ҳамма нарсани билади. Масалан, қандай ўйнаш, кимга ва қачон тўп узатиш, турли вазиятларда самарали ҳаракат қилиш...».
Жаҳон футболида ҳам янгиликлар бисёр. Масалан, «Реал Мадрид» футболчилари ўрин олган автобус тошбўрон қилинган. Оқибатда автобуснинг бита ойнаси чилпарчин бўлган.
Хабарда таъкидланишича, ушбу ҳолат 2010/2011 йилги мавсумнинг ўзида учинчи марта содир бўлган. Улардан бири «Эль-Класико» арафасида «Барселона» мухлислари томонидан содир этилган.
ФИФАда эса сайлов яқин. Ўша пайтларда ташкилот президенти бўлган Зепп Блаттернинг маълум қилишича, агар у ФИФА президентлиги учун сайловларда мағлуб бўлса, ташкилот ўз фаолиятини тўхтатиши ҳам мумкин.
Хабардаги яна бир эътиборга молик жиҳат – Англия футбол ассоциациясининг Блаттерни ҳам, ОФК президенти Муҳаммад бин Ҳаммамга ҳам сайловларда овоз бермаслиги.
«Футбол-Экпресс» газетасида эса Океания Футбол Конфедерацияси сайловда Блаттерни қўллаб-қувватлашга қарор қилгани айтилган хабар эълон қилинган.
Газетада, шунингдек, «Бухоро» жамоаси бош мураббийи Геннадий Геннадевич билан суҳбат чиққан. «Бугунги кунда Европанинг аксарият клублари 4-3-3 схемасига ўтмоқда. Бизнинг жамоаларда шундай вазифаларни амалга ошириш учун ижрочиларнинг савияси етарли даражадами?», деб берилган саволга мураббий Ўзбекистон миллий терма жамоаси ҳужумкор футболга эътибор қаратаётганини таъкидлаган.
«Акрамов зўрми ёки Абрамов?» сарлавҳали мақолада Ўзбекистон терма жамоасини 1994 йилда Осиё ўйинлари ғолиби қилган Рустам Акрамов ҳамда 2011 йилга Осиё Кубогида терма жамоани ярим финалга олиб чиққан Вадим Абрамов солиштирилган.
Мақоладаги эътиборга молик иқтибос, жумладан, шундай: «Ҳозир Вадим Абрамов терма жамоамиз тарихида энг омадли мураббийлардан бири сифатида тилга олинмоқда. Чиндан ҳам у илгари мисли кўрилмаган ишни амалга ошириб, вакилларимизни қитъа чемпионатининг ярим финалига олиб чиқди».
Жаҳон ва Осиё чемпионатларининг саралаш учрашувлари, Осиё Кубоги ва Осиё ўйинларида ўтказилган баҳслар инобатга олинган статистикага кўра, Рустам Акрамов ўз даврида 7 та ўйиннинг барчасини ютган. Абрамов эса 6 ўйиндан 3 тасини ютиб, 2 та мағлубият ҳамда 1 марта дуранг ўйнаган.
Футбол янги инқилоб бўсағасида – ФИФА футбол қоидаларига ўзгартириш хусусида муҳокама юритишни бошлаган. Киритилиши мумкин бўлган ўзгаришлардан бугунги кунда барчага маълум бўлиб улгургани – гол киритилгани борасида муаммо юзага келган маҳалда уни аниқлаш учун замонавий технологиядан фойдаланиш.
Барчага маълум, бугунги кунда аксарият мусобақаларда гол бўлгани ҳақидаги маълумот ҳакамнинг қўл соатига келади. Шунингдек, қўшимча бўлимларда яна битта захира алмаштиришга рухсат бериш ва ўйинларга аёл ҳакамларни кўпроқ жалб қилиш таклифлари ҳам ҳозир кунда амалда.
Изоҳ (0)