Шавкат Мирзиёев ҳузурида 11 май куни ўтказилган йиғилишда ун ва ун маҳсулотларининг бозорда тақчиллигига йўл қўймаслик ва нархлар барқарорлигини таъминлашга вилоят ҳокимлари шахсан масъул ва жавобгар бўлиши таъкидланди. Бу ҳақда президент матбуот котиби хабар қилди.
Қайд этилишича, мутасаддиларга 1 августга қадар 20 та дон корхонасидаги давлат улушини савдога чиқариш, бир ой муддатда дон корхоналари қошида ташкил этилган нон цехлари ва савдо дўконларини хатловдан ўтказиб, савдога чиқариш топширилган.
«Вилоят ҳокимлари ва прокурорлари яхшилаб эшитиб олсин. Ўзгаришларни баҳона қилиб, жойларда ун ишлаб чиқариш ҳажмларини камайтириб юбориш, нарх-навонинг асоссиз ўсишига йўл қўйишга саботаж деб, сиёсий баҳо берилади.
Шу боис вилоят ҳокимлари ва прокурорлари дон корхоналарининг мавжуд ишлаб чиқариш ҳажмларини сақлаб қолишга боши билан жавоб беради», — дейди президент.
Бу борада ҳокимлар, ички ишлар ва прокуратура органлари раҳбарларига ижтимоий тармоқларда чиқиш қилиб, янги ислоҳотларнинг мазмун-моҳияти, қандай чоралар кўрилиши ва режалари бўйича тушунтириш бериш вазифаси қўйилган.
Мавзуга доир:
- «Турли важлар билан фермерлар ғалласини олиб қўйиш қатъиян тақиқланади» — Шавкат Мирзиёев
- Ўзбекистонда Қишлоқ хўжалиги жамғармаси харид қилган 1 млн 783 минг тонна буғдой эҳтиёжга қараб ойма-ой биржага чиқарилади
- Ўзбекистонда 1 июндан бошлаб ғаллани давлат томонидан сотиб олиш ва сотишда бозор нархларига ўтилади
Изоҳ (0)