Наманган вилояти ҳокими Шавкат Абдураззақов бошчилигидаги делегация Қашқадарёга келди

Наманган вилояти ҳокими Шавкат Абдураззақов бошчилигидаги делегация Қашқадарёга келди. Бу ҳақда «Дарё» мухбири Азизбек Абдувалиев хабар бермоқда.

Вилоят ҳокимининг ўринбосарлари, бошқарма, корхона-ташкилот раҳбарлари ва тадбиркорлардан иборат 150 кишидан ортиқ Наманган делегацияни Қарши халқаро аэропортида Қашқадарё вилояти ҳокими Муроджон Азимов бошчилигидаги мезбонлар кутиб олди.

Наманган делегациясининг Қашқадарёга сафари Қарши туманидаги «Абу Муин Насафий» мажмуаси зиёратидан бошланди. Ислом дини, хусусан, ақида илми ривожига беқиёс ҳисса қўшган буюк аллома мақбарасида Қуръон тиловат қилинди. Мажмуада ташкил этилган кутубхона ва музей билан танишилди.

Шундан сўнг Қашқадарё вилоятининг салоҳияти ва имкониятлари тақдимоти бўлиб ўтди. Тақдимот давомида наманганлик ишлаб чиқарувчилар ва тадбиркорларни қизиқтира оладиган ҳудудлар ва соҳаларга эътибор қаратилди. Жумладан, вилоятда фаолиятини бошлаётган эркин иқтисодий зоналарга алоҳида урғу берилди.

Наманган вилояти делегациясининг Қашқадарёга сафари давом этмоқда.

Эслатиб ўтамиз, жорий йил март ойида Қашқадарё вилояти ҳокими Муроджон Азимов бошчилигида шаҳар, туман ҳокимлари ва тадбиркорлардан иборат делегация кичик саноат зоналари ташкил этиш ва тадбиркорликни ривожлантириш тизими билан танишиш мақсадида Наманганга келганди.