Чироқчида ЙПХ ходимларига тажовуз қилган 7 нафар фуқаро 15 суткага қамалди

Қашқадарё вилояти Чироқчи туманида 26 апрель куни бир гуруҳ фуқаролар ЙПХ ходимларига қаршилик кўрсатгани хабар қилинганди. Ички ишлар вазирлигининг маълум қилишича, ходимларга тажовуз қилган шахслар жазоланган.

Шу куни соат 17:30 ларда ЙПХ инспекторлари Б.Б. ва Б.К. Lacetti хизмат машинасида тумандаги озиқ-овқат деҳқон бозори рўпарасида хизмат вазифасини олиб бораётган бўлган. Ходимлар кўчада юзага келган тирбандликнинг олдини олиш мақсадида тақиқланган жойда тўхтаб турган автомобиль ҳайдовчиларини овоз кучайтиргич орқали қоидаларга риоя этишга чақирган.

Бироқ фуқаролар Н.Ш., Н.Б. ва Қ.А. ЙПХ инспектори бошқарувидаги автомашинанинг ҳаракатланишига йўл қўймасдан, ёнига бошқа фуқароларни тўплаб, хизмат автомашинасини тўхтатган. ЙПХ ходимларини хизмат кийими, бодикамераси ва кўкрак нишонини юлиб олиб, уларнинг қонуний фаолиятига фаол қаршилик кўрсатган.

Қайд этилишича, жамоат тартибини бузишда ва ходимларга тажовуз қилишда қатнашган барча фуқаролар туман ИИБга олиб келиниб, шахси аниқланган. Ҳолат юзасидан Жиноят кодексининг 219-моддаси 2-қисми билан жиноят иши қўзғатилиб, ходимларга қаршилик кўрсатган шахслар эҳтиёт чораси сифатида қамоққа олинган.

«Укам телефон қилди, ЙПХ ходимлари билан уришиб қолдик деди. Дарров етиб бордим. Ходимлардан бирининг погонини юлиб олдим. Пастга қарасам, бодикамераси ҳам турган экан. Иккисини олиб, орқага узатдим, ким олганини билмайман.

Қизиққонликда билмасдан қилиб қўйдим. Ўзимга келган вақтим кеч бўлганди. Хато қилдим, қайтарилмайди», — дейди қоидабузар фуқаролардан бири.

«Ўртоғим билан ЙПХ ходими тортишиб қолди. Кейин бошқа фуқароларнинг гижгижлаганига учиб, ўртоғимни машинадан тушириш учун ходимнинг оёқларидан тортиб, қаршилик қилдим.

Халқдан кечириб сўрайман. Бошқа қайтарилмайди», — деган яна бири.

Қашқадарё ИИБ матбуот хизмати «Дарё»га аниқлик киритилишича, Жиноят ишлари бўйича Чироқчи туман суди томонидан воқеада иштирок этган 9 киши устидан Маъмурий жавобгарлик тўғрисидаги кодекснинг 183-моддаси, 194-моддаси 1-қисми, 195-моддаси, 201-моддаси 1-қисми билан маъмурий иш кўриб чиқилган. Суд қарори билан улардан 7 нафарига 15 сутка маъмурий қамоқ жазоси тайинланган. 2 нафари огоҳлантириш олган.

Бундан ташқари, Деҳқонобод тумани прокуратураси томонидан воқеада иштирок этган яна 4 кишига жиноят иши қўзғатилган.