Ўзбекистон дастлаб кўчиш учун машҳур мамлакат эмас эди. Аммо сўнгги ойларда Россия ва Беларусдан 5000-6000 га яқин одам кўчиб келди. Forbes шундай одамлар орасида сўровномалар ўтказди ва уларнинг таасуротларини тақдим этди.
Сўровномада қатнашган россияликлар Ўзбекистонни, асосан, авиачипталарнинг нисбатан арзонлиги туфайли танлаган.
Ўшанда (март ойининг биринчи кунларида) Ўзбекистон умуман машҳур эмас эди, бу мамлакат кўчиш бўйича қўлланмаларда ҳам йўқ эди. Аммо Туркия ва Арманистонга чипталар ҳар бири 50-200 минг рублдан, Ўзбекистонга эса 20 мингдан бўлганлиги сабаб у яхши вариантга айланди, — деб эслайди Skyeng маҳсулот менежери Дмитрий Абрамов.
PPL Мedia агентлигининг рақамли реклама бўйича мутахассиси Максим Пономарев худди шундай сабаб ҳақида гапиради.
Дастлаб у рафиқаси билан нисбатан машҳур Арманистон ва Грузияга кўчиш ҳақида ўйлашади. Эр-хотин Россиядан биринчи марта мушук билан учиб кетишга тайёргарлик кўраётганлиги сабабли улар ҳайвоннинг кетиши учун ҳужжатларни расмийлаштиришда бир қатор қийинчиликларга дуч келишади.
Биз тафсилотларни ўрганиб, ветеринария клиникаларида эмлаш ва муҳрлаш ишларини ҳал этаётганимизда Ереванга чипталар нархи кескин кўтарилганлиги маълум бўлди. Шунинг учун биз МДҲ мамлакатларидаги мавжуд вариантларни саралашни бошладик ва «Аэрофлот»нинг Тошкентга анча арзон чипталарини учратдик, — деб эслайди Пономарев.
Мустақил эмиграция билан боғлиқ асосий қийинчиликлардан бири узоқ муддатли қолиш учун уй-жой қидириш ҳисобланади.
Максим Пономаревнинг айтишича, меҳмонхонадаги биринчи кунлариданоқ у квартира қидира бошлаган. Аммо мушук қидирувни жуда қийинлаштирган.
Биз мушугимиз билан жойлашишимиз мумкин бўлган жойлар кам эди, чунки мамлакатга кўплаб муҳожирлар келиши билан уй-жой тобора камайиб борди. Қўшимча равишда рублнинг қадрсизланиши билан бирга нарх ўсди, — дейди у.
Натижада Пономарев рафиқаси билан москвалик ҳамкасбининг Тошкентдаги квартирасига кўчиб ўтган.
Фамилиясини айтмасликни маъқул кўрган Skoltech компаниясининг сунъий интеллект бўйича мутахассиси Егорнинг таъкидлашича, Ўзбекистонда уй ижарага олиш Россиядагидан ҳам қийинроқ. Сабаби республикада эълонлар учун махсус сайтлар йўқлигида деб ҳисоблайди у.
Фақат маҳаллий OLX эълонлар тахтаси бор. У ерда эса эълонлар бутунлай тартибсиз жойланган. Бу эса охир-оқибат танишларингизга ишониб ёки риелторга пул тўлабгина ижарага уй олишингизга сабаб бўлади, — дейди Егор.
Нархларнинг ўсиб бораётганига қарамай, Forbes суҳбатдошлари Ўзбекистонда ҳаёт нисбатан арзон эканлигини таъкидлайдилар.
Маҳаллий «ЯндексТакси»нинг нархи мени қониқтирди. Ҳатто энг ёмон об-ҳавода ҳам шаҳар бўйлаб саёҳат ўртача 150-200 рублдан ошмайди. Жамоат транспорти ва метро ҳам анча арзон, — дейди PPL Мedia’дан Пономарев.
Яна бир фарқли жиҳати шундаки, пластик карточкалар билан тўлов амалга ошираётганда маҳаллий дўкон эгалари кўпинча харидорлардан картани пештахтага бериб, PIN кодини айтишни сўрашади.
Сотувчилар доимий мижозларнинг PIN кодларини ёддан билишади. Кўпчилик маҳаллий аҳолини кодлари одатда 1111 экан. Бунга эса ҳатто ижтимоий реклама ҳам қарши, — дейди Егор.
Бизда ҳатто россияликни PIN код ёзишдан бош тортиши билан аниқлаш мумкин, деган ҳазиллар ҳам бор эди, дея буни тасдиқлайди Spaceborne космик стартапи асосчиси Аҳрор Аъзамов.
Сўровнома иштирокчилари маҳаллий аҳолини дўстона ва меҳмондўстлиги, мазали ва арзон таомлари, шаҳарлар тозалиги ва тил тўсиқларининг деярли йўқлиги (маҳаллий аҳолининг аксарияти рус тилида гаплашади)ни таъкидлаган.
Биз жуда хурсандмиз. Бизларни меҳмондўстлик руҳида зиёфатга жалб этиш бўйича маҳалла жамоатчилиги, оддий фаоллар турли ташаббуслар билан чиқди. Telegram’да маърузалар, веб-семинарлар, тармоқ учрашувлари, саёҳатлар, зиёфатлар ва кўп суҳбатлар уйиштирилди. Маҳаллий аҳоли банк картасини қаерда очиш яхшироқлиги ҳақида сабр билан беш юз марталаб ҳам саволларимизга жавоб беришди, — дейди Егор.
Бироқ кўпчилик хорижликлар Ўзбекистонда яшаб қолишни узоқ муддатли мақсад сифатида кўрмайди. Масалан, Пономарев ёз бошида Туркияга кўчиб ўтишни режалаштирган.
Бизни Ўзбекистондаги ёзнинг жазирамаси, ҳатто сояда ҳам ҳаво ҳарорати 40-45°C га етиши қўрқитяпти. Интернет билан боғлиқ муаммолар ҳам бор — тўсатдан бир мунча вақт интернетга уланиш жуда секинлашиши ёки бутунлай йўқолиши мумкин, — дея таъкидлайди у.
Унинг танишлари орасида кўпчилик Португалия, Мальта, Исроил, Арманистон ёки АҚШга кўчиб ўтишни режалаштирмоқда.
IT Park директорининг халқаро фаолиятлар бўйича ўринбосари Баҳодир Аюпов таъкидлашича, биринчи тўлқинда Ўзбекистонга келган кўплаб муҳожирлар ўз ватанларига қайтиш ёки кейинчалик учинчи мамлакатларга кўчиб ўтиш режалари билан келганлар.
Бу ер қанчалик ажойиб бўлмасин, маълум бир шароит туфайли бу ерга келишган бўлса, барибир ортларига қайтиб кетишади, — дейди Аюпов.
Унинг ҳисоб-китобларига кўра, муҳожирларнинг камида 20 фоизи Ўзбекистонга доимий яшаб қолади.
Аввалроқ Украинада уруш бошланганидан сўнг бир неча Беларуснинг IТ компаниялари ва IТ мутахассислари Тошкентга кўчиб ўтаётгани ҳақида хабар берилган эди.
Изоҳ (0)