2022 йилда Қашқадарёда 500 нафар эҳтиёжманд аёлларга уй-жой сотиб олиш учун субсидиялар берилади

2022 йилда Қашқадарё вилоятида 20 та давлат, 23 та давлат-хусусий шериклик, 130 та оилавий боғчаларни қурилади ва реконструкция қилинади. Бу ҳақда Шавкат Мирзиёев Қарши шаҳрида бўлиб ўтаётган халқ депутатлари вилоят кенгашининг навбатдан ташқари сессиясида айтиб ўтди, деб хабар бермоқда «Дарё» мухбири.

Бунда қўшимча ажратилаётган 75 миллиард сўм ҳисобидан, 5 та янги боғча қурилади ва 11 таси реконструкция қилинади.

Соғлиқни сақлаш вазирлигига 2022 йил якунига қадар 95 та олис маҳаллада маҳалла тиббиёт пунктларини ташкил этиш топширилди. Қарши шаҳридаги перинатал марказ, туғруқ комплекси, скрининг ва репродуктив саломатлик марказида қурилиш ва жиҳозлаш ишларини якунлаб, 2022 йил охиригача ишга туширилади.

Шунингдек, 813 та маҳаллада ёшлар етакчилари томонидан ёшларнинг бўш вақтини мазмунли ташкил этиш, «ёшлар дафтари»даги 8 минг нафар ёшлар муаммоларини ҳал этиш бўйича тизимли ишларни ташкил қилиш кераклиги таъкидланди.

Бундан ташқари, 2022 йилда 58 минг нафар ишсиз хотин-қизлар бандлигини таъминлаш чорасини кўриш зарурлиги айтилди. Шунингдек, 8,5 минг нафар хотин-қизларга тадбиркорлик фаолиятини бошлаши учун, 83 миллиард сўм имтиёзли кредитлар йўналтирилади. 1 200 нафар аёлларга тикувчилик, ип-йигирув, қандолатчилик ва сартарошлик ускуналари сотиб олиш учун, субсидиялар ажратилади. Шунингдек, 8,5 минг нафар хотин-қизлар касаначиликка жалб этилади. 2022 йилда вилоятда 500 нафар эҳтиёжманд аёлларга уй-жой сотиб олиш учун субсидиялар берилади.

«Ижарада яшаётган 785 нафар аёлларга компенсация ажратилади, 112 нафар муҳтож ва уй-жойсиз ёлғиз аёллар ижтимоий уйларга жойлаштирилади. Шунингдек, 4 700 нафар ёлғиз ва муҳтож аёлларнинг фарзандлари учун давлат боғчалари тўлови бюджетдан қоплаб берилади», — дейди давлат раҳбари.

Молия вазирлиги ҳамда Олий таълим вазирлигига янги ўқув йилидан 12 410 нафар талаба қизларга контракт тўлови учун фоизсиз кредитлар беришни бошлаш топшириғи берилди. Янги ўқув йилидан бошлаб, магистратурада контракт асосида ўқиётган 702 нафар талаба қизларнинг контракт пулларини бюджетдан тўлаб беришни таъминлаш кераклиги айтилди.