2022-yilda Qashqadaryo viloyatida 20 ta davlat, 23 ta davlat-xususiy sheriklik, 130 ta oilaviy bog‘chalarni quriladi va rekonstruksiya qilinadi. Bu haqda Shavkat Mirziyoyev Qarshi shahrida bo‘lib o‘tayotgan xalq deputatlari viloyat kengashining navbatdan tashqari sessiyasida aytib o‘tdi, deb xabar bermoqda “Daryo” muxbiri.
Bunda qo‘shimcha ajratilayotgan 75 milliard so‘m hisobidan, 5 ta yangi bog‘cha quriladi va 11 tasi rekonstruksiya qilinadi.
Sog‘liqni saqlash vazirligiga 2022-yil yakuniga qadar 95 ta olis mahallada mahalla tibbiyot punktlarini tashkil etish topshirildi. Qarshi shahridagi perinatal markaz, tug‘ruq kompleksi, skrining va reproduktiv salomatlik markazida qurilish va jihozlash ishlarini yakunlab, 2022-yil oxirigacha ishga tushiriladi.
Shuningdek, 813 ta mahallada yoshlar yetakchilari tomonidan yoshlarning bo‘sh vaqtini mazmunli tashkil etish, “yoshlar daftari”dagi 8 ming nafar yoshlar muammolarini hal etish bo‘yicha tizimli ishlarni tashkil qilish kerakligi ta’kidlandi.
Bundan tashqari, 2022-yilda 58 ming nafar ishsiz xotin-qizlar bandligini ta’minlash chorasini ko‘rish zarurligi aytildi. Shuningdek, 8,5 ming nafar xotin-qizlarga tadbirkorlik faoliyatini boshlashi uchun, 83 milliard so‘m imtiyozli kreditlar yo‘naltiriladi. 1 200 nafar ayollarga tikuvchilik, ip-yigiruv, qandolatchilik va sartaroshlik uskunalari sotib olish uchun, subsidiyalar ajratiladi. Shuningdek, 8,5 ming nafar xotin-qizlar kasanachilikka jalb etiladi. 2022-yilda viloyatda 500 nafar ehtiyojmand ayollarga uy-joy sotib olish uchun subsidiyalar beriladi.
“Ijarada yashayotgan 785 nafar ayollarga kompensatsiya ajratiladi, 112 nafar muhtoj va uy-joysiz yolg‘iz ayollar ijtimoiy uylarga joylashtiriladi. Shuningdek, 4 700 nafar yolg‘iz va muhtoj ayollarning farzandlari uchun davlat bog‘chalari to‘lovi budjetdan qoplab beriladi”, — deydi davlat rahbari.
Moliya vazirligi hamda Oliy ta’lim vazirligiga yangi o‘quv yilidan 12 410 nafar talaba qizlarga kontrakt to‘lovi uchun foizsiz kreditlar berishni boshlash topshirig‘i berildi. Yangi o‘quv yilidan boshlab, magistraturada kontrakt asosida o‘qiyotgan 702 nafar talaba qizlarning kontrakt pullarini byudjetdan to‘lab berishni ta’minlash kerakligi aytildi.
Izoh (0)